0408日本8天之旅~Day 7
Day 7(11/4)
富士急Thomas Land
今日向富士急既Thomas Land出發,由於噚日落好大雨,所以好驚今日都係咁,不過好好彩早上起身都仲係陰陰天,但去到富士急已經放晴,唔該晒!
喺香港出發前我已經喺富士急個網頁登記咗做會員,所以帶埋張print out去買入場券就會有折喇.
(途經見到一棵又大又靚既櫻花樹)
其實去富士急真係好鬼遠,如果喺新宿出發有巴士直車到要大約兩個半鐘,如果由妹妺度去,可以有兩方法,一係搭半個鐘JR去橫浜再坐兩個鐘巴士去;另一個方法係坐一個鐘JR去到御殿場再坐一個鐘巴士去.
(途經仲見到一個係囝囝個名既駅添呀,可惜唔夠時間落車影張合照)
我哋當然揀咗後者兩個鐘嗰個方法去啦,再加上回程時可以順路去御殿場個outlet行吓,一舉兩得呀!而爸爸就更加一舉三得添,因為喺御殿場outlet有間Nikon outlet有啲出面買唔到既Nikon X Porter既產品賣,發達囉!雖然最後爸爸都只係買到條相機帶,不過佢唔去過又點會心息呢!
講番Thomas Land,去到天氣好到不得了,中午時段仲覺得太曬添.
亦由於唔係假期既關係,真係人少都爆,全部遊戲都可以玩完又玩,囝囝真係開心到爆,因為佢都係一個Thomas迷嚟架!
我哋入場只係買咗一張小朋友既full pass,一張大人既full pass,同一張淨入場券,因為我負責陪囝囝玩,爸爸負責影相,不過由於嗰日太少人,我同爸爸就輪住用張full pass同囝囝玩啲遊戲呀!嘻!
至於場內既Thomas店所買既野當然比香港一般既水貨店平好多,而且嗰度仲有好多富士急限定Thomas產品係出面冇得賣,所以我哋都掃咗啲貨.
唔記得提既係富士急係好近富士山,所以好天既話仲可以欣賞到好靚既富士山景添呀!
御殿場outlet
回程時囝囝當然又係頂唔順瞓咗,我哋就喺轉車站去御殿場outlet行吓,呢度大過bayside outlet起碼兩倍,店鋪亦好齊,如果鍾意名牌既就啱晒.雖然我就唔係咁鍾意名牌,但因為佢連bayside outlet無既無印良品,Disney store,Gap Kids等都有,所以都執到少少貨啦!
到夜晚本來想喺outlet度食埋飯先返屋企,但係嗰度啲食店都同outlet一樣8點關門,所以唯有喺御殿場JR站附近搵野食.
本來我哋搵咗一間睇落唔錯既日本餐廳,爸爸入去問有冇位,起初佢話會安排,點知當個店員見到我哋有小朋友時,佢哋就即刻話冇位,真係好黑人憎呀!!!!!!
最後就喺一間西式餐廳醫肚就算!
後來妹妹話我知,日本好多餐廳都唔係咁歡欣小朋友,但佢哋又唔會白紙黑字寫到明,所以佢哋就會明明有位都話冇位,真係好黑人憎呀!所以妹妹叫我哋問之前睇吓餐牌有冇小朋友餐先入去食就包冇衰喎!
TAG:
