0408日本8天之旅~Day 3
Day 3 (7/4)
橫浜麵包超人博物館
由於今日會去嗰三個地方都喺橫浜MM21區,同埋全部都喺室內.所以就算天文台話今日會落大雨都冇有怕.
第一站先去麵包超人博物館玩,基本上呢個館係啱啲比較細既小朋友去玩,好似我個仔得三歲半,見佢就真係玩得好開心.如果佢唔係眼瞓而我哋又趕住去另外兩個地點,我諗佢玩到天黑都得呀!
(間shop既中間位置有個小型遊樂場俾小朋友玩,咁大人就可以去shopping喇)
至於shopping,因為一早睇到啲網友都話呢度啲野俾其他鋪頭貴,而嗰度啲限定品又冇咩特別,所以最後一樣都冇買到.
(另一間餐係食心型包同飲coffee)
反而喺嗰度食既麵包超人餐就好好味!值得一試.
臨走前本來想去麵包鋪買啲好得意既麵包超人包食,但係囝囝C都唔肯入去,唯有算吧!
西松屋
跟住去咗轉個彎就到既西松屋行,呢個時候囝囝已經攰到瞓著咗,啱晒~大人可以舒舒服服shopping.
之前兩次去日本旅行都去過另外一間比較偏僻既西松屋,每次都買唔停手,因為真係平過香港西田同JUCSO嗰啲日本貨.至於今次呢間貨品種類就比較少,可能因為係市區店,同埋又係旅遊熱點之一,所以都唔係買咗好多,只係執到幾件好野.
不過妹妹就買到一條一減再減,只係99yen既毛毛BB長衭,真係好抵.
我妹妹話日本人減價啲野真係好抵,而且佢哋仲會講到明有冇損壞定係display貨品定係月下貨嚟減,等顧客自己選擇.
妹妹仲話喺減價季節即係一月同七月,店鋪會推出好多福袋,裡面既貨品總值一定會抵過你付出既好多,不過因為冇得睇裡面有啲咩,所以要睇彩數執唔執到筍野喇!
Jack Mall玩具反斗城
Shopping完繼續行去對面街個Jack Mall,嗰度有間好大既100yen店,又有玩具反斗城,所以我同老公就兵分兩路,爸爸就同啱啱醒咗既囝囝去玩具反斗城行同玩,我就同妹妹去100yen店掃吓貨先,跟住再返反斗城同佢哋會合.
兩邊都買到啲筍野,尤其喺反斗城就只係用咗1000yen執到對喺香港買成三百蚊既車王波鞋;同埋一頂雖然冇特價,但香港冇既車王單車頭盔.
不過臨離開時就落起大雨,行去地鐵站就全冇遮擋,我哋幾個大人唯有快步行去地鐵站,至於大少爺呢當然好安然咁坐喺佢架有雨擋既私家車仔裡面邊嘆M記薯條邊欣賞雨景啦!
由於前一晚有過差啲趕唔到車返屋企既經驗,所以夜晚就只係喺橫浜車站附近是旦搵咗間日本野食完就返屋企喇!
TAG:
