0408日本8天之旅~Day 1

Day 1 (5/4) 香港~茅ヶ崎

茅ヶ崎

今次係我哋第一次同囝囝出外旅行,所以事前工夫都做到好足,例如一早攞定晒所有行程上所需既資料,就連點樣轉車都一早用excite乘換案內check定晒.

再加上驚佢出外水土不服,所以一早去醫生度攞定啲平安藥.

出發前一晚我同老公都唔係好瞓得著,因為又驚唔知醒又驚唔記得呢樣嗰樣.

我哋搭1045機,老公0630就起咗身做準備喇!

可能我哋早已不停同囝囝講會去旅行,所以囝囝嗰日出奇地一叫即醒.

終於出發喇,我哋三個都好興奮呀,囝囝仲爭住話要自己拉番佢個巴斯旅行喼.

我同老公初時都有啲擔心囝囝搭飛機會扭計,或者起飛降落時會耳仔唔舒服,好彩最後都順利過度,佢仲好enjoy搭飛機添!

可能我哋唔係假期去,所以到咗日本機場過關都好順利,再加上有小朋友可以行特別通道,超快出到境.

跟住就去買專為遊客而設既成為3000yen既Sucia+NEX票,包括一張NEX車飛+1500yen Sucia儲值同500yen按金,雖然嗰500yen按金你都唔好望攞得番,因為取消張咭時都要俾手續費,但計落都已經好抵,同埋張咭可以十年內使用.

而我哋就最抵,因為我哋係去妹妹屋企住,所以搭NEX係去到最遠個站~大船先落車,淨係呢程車錢正價就要四千幾yen,所以超抵.而Sucia其實就好似我哋喺香港用既八達通咁,好方便唔駛次次都要走去部機買飛.

茅ヶ崎JUSCO

由於我妺妹一家係住喺日本,所以整個日本之旅程就喺妹妹橫浜既大屋度住喇!

不過因為妹妹家並唔係市區,而係橫浜市再入啲,所以去到妹妹屋企已經七點幾,爭取時間我哋9秒9放低行季就拿拿林去咗妹妹家附近既JUSCO行吓兼買熟食返屋企食.

日本既JUSCO大好多,賣既貨品當然好唔同啦,喺JUSCO我哋都買咗兩件700yen既減價Tee,同埋香港未見過既Tomica Tee俾囝囝,至於其他小朋友既用品玩具等我哋都冇買,因為反斗城同西松屋會再平啲.

至於超市就比香港既JUSCO呀西田呀嗰啲日本百貨買既日本野平好多,所以我哋買咗好多野返屋企食呀,真係食到走個日都未食完呀!