帶小朋友看劇 寓教育於娛樂

Posted on July 2, 2015 By       3,204

Print

較早前,我同仔仔去咗睇兒童木偶劇。呢套劇嘅故事,係大家耳熟能詳嘅小紅帽。

 

小紅帽呢個故事我同我仔仔講咗超過一百次以上,嗰種感覺我諗好多家長和老師們都好明白,所以小紅帽嘅故事出現咗好多新嘅情節.例如多咗伐木工人、獵人、婆婆由森林搬咗去狹谷、小紅帽由行路變成搭車甚至搭地鐵等等,務求令到講者唔會未講完就瞓着(因為聽嗰個永遠都唔會悶)。而今次,小紅帽嘅故事入面嗰隻大灰狼,竟然變咗隻可愛嘅狗仔。令到一眾害怕大灰狼嘅小聽眾,立時成為小紅帽的忠實粉,厲害厲害!

 

其實透過睇戲劇,小朋友可以學到好多。佢哋可以透過觀察,明白到底演戲係咩一回事。當我哋睇電視,或者電影時,因為個畫面太過真實,小朋友好多時都會以為事件係真正發生緊。但睇劇就唔同,除咗觀眾會投入喺個表演入面之外,小朋友都好清楚睇見演員點樣投入喺套劇入面,故事係點樣演繹出嚟,睇得多,佢哋就會產生興趣,繼而模仿,從而進步

 

更加重要嘅係,小朋友仲可以學到點樣尊重表演者,係一尐好基本嘅嘢,例如要比預定時間早到,做好準備(即係食飽肚,去洗手間等),因為在場內不准飲食,亦不設中場休息,不要使用電話,尤其不准錄影同拍照。身為家長,我哋係有責任,亦都有能力做孩子嘅榜樣,唔需要工作人員提醒。

 

有尐家長可能會認為,如果早到入咗場又未開始,小朋友會好悶,坐唔定,咁點算?其實我哋大可以收埋手機,然後拎本場刊出嚟同小朋友一齊研究一下,等小朋友心理上準備好,而且場刊設計精美,係主辦單位好俾心機製作出嚟,唔好哂咗佢。

 

最後唔少得梗係同最喜歡嘅角色影相啦~

20150702_drama

 

下個月,我同仔仔就會去睇另一套經典故事──青蛙王子。

20150702_drama03

 

圖片來源:明日藝術教育機構

 

小米
自己是一名大孩子,又育有一名兒子,更幫助其他家庭照顧他們的子女,偶而義務到學校講故事,並於學校座談會分享育兒經驗。
 
  • 搜 尋
  • APP
  • 網 站
© Baby-Kingdom.com Limited. All rights reserved.