安坐家中,也能放眼世界:《世界城市趴趴走》與《世界奇景趴趴走》

Posted on July 8, 2015 By       2,586

20150624_095033

小米媽媽係一個好鐘意周圍去闖蕩江湖嘅人,環遊世界係終極夢想。不過帶住仔仔後,也不能太亂來,尤其係仔仔每次都話「搭飛機會喺天空跌落嚟跌死」同「搭船會跌落海浸死」的時候(汗)。

 

好在,小小米同我都好鐘意睇書,尤其去書店「打書釘」。呢次,就俾我發現到寶物啦(哈哈)。

 

呢套書一共有兩本,分別係《世界城市趴趴走》同埋《世界奇景趴趴走》。呢兩本係旅遊札記,作者貝雅蒂斯係法國人,以生活在巴黎的歐爸爸一家為主,帶住一家大細一齊環旅世界冒險。

 

香港,係一個國際城市,香港嘅機場好繁忙,差不多每兩分鐘,就有一架飛機喺仔仔頭上飛過。雖然佢好怕坐飛機,但係每次佢見到天空上的飛機,就會同我講搭飛機可以去英國探表哥、去加拿大探叔公……對於仔仔嚟講,呢套書可以擴濶視野,而對於我嚟講,就當係望梅止渴吧。

 

在《世界城市趴趴走》中,根據仔仔嘅講法,喺莫斯科可以睇到「雪糕城堡」、喺阿姆斯特丹可以坐木鞋船、喺東京可以坐高架列車、喺巴西有好似海洋公園嘅吊車(莫非巴西都有海洋公園?)……

 

仔仔最鐘意就係英國倫敦,由於表哥喺英國讀書,每年仔仔生日時,佢都會寄一份禮物嚟送給仔仔,當中包括倫敦嘅巴士同的士,所以每次睇到呢個地方,佢就會攞架巴士出嚟比對一下,睇下咪真係一模一樣。

20150624_095316

 

還有,仔仔仲發現倫敦的大笨鐘,竟然同尖沙咀的鐘樓十分相像。一路睇落去,有個更大的發現,就係大笨鐘隔離,有個佢最鐘意嘅,同中環嗰個一樣嘅摩天輪,仔仔不禁問我,「其實我哋係咪住喺倫敦?」

 

而在《世界奇景趴趴走》中,歐爸爸帶住屋企人一齊去探索世界著名的地理環境,並附帶其中的奇聞軼事,例如喜馬拉雅山有雪怪、亞馬遜雨林中續漸消失的五彩金剛鸚鵡、尼斯湖水怪、加勒比海的海盜傳說等等,這些引人入勝的故事,可以引發小朋友探索的興趣,以後仲可以引入類似環境保護等的討論話題。

20150624_095801

 

令我感受最深嘅係,上年我哋一家人去過海洋公園,當我哋排隊玩機動遊戲時,有位姐姐拎住隻色彩繽紛嘅鸚鵡,同仔仔講咗關於呢隻鸚鵡嘅故事,姐姐話呢種鸚鵡叫五彩金剛鸚鵡,由於人類不停破壞森林,所以快要絕種了。當仔仔喺書度見到佢哋,仔仔就同我講返呢個故事,仲話我哋要用少尐紙張,唔好浪費,砍伐一棵樹要種返十棵等等,令我覺得好感動(淚)。

20150624_095820

 

我好欣賞呢套書,書中喺唔同嘅地方包含咗隱藏遊戲,除咗提高閱讀興趣之外,仲可幫助小朋友提高閱讀時的專注力。另外,作者於每一個旅遊地點都附上一頁旅遊指南,當中以明信片、繪畫、照片等記錄當地的詳細資料,例如國旗、通用錢幣、語言文字、特色產品和食品等,除咗可以讓小朋友認識不同地方的歷史文化之外,仲可以學習點樣用不同方法的記錄旅行時的所見所感,與人分享。

20150624_095652

 

小米
自己是一名大孩子,又育有一名兒子,更幫助其他家庭照顧他們的子女,偶而義務到學校講故事,並於學校座談會分享育兒經驗。
 
  • 搜 尋
  • APP
  • 網 站
© Baby-Kingdom.com Limited. All rights reserved.