今日哥哥要同媽咪喺屋企溫習功課,
又係時侯俾我同芊芊拍拖嘅時侯,
我就同芊芊喺石硤尾附近周圍行,
睇吓有d咩睇有d咩玩,行行吓我哋嚟咗「美荷樓」。
我哋沿住巴域街行行吓就嚟咗呢度,
其實前一排都一陣想嚟呢度,
只不過實在太遠所以冇機會嚟,
依家搬咗嚟呢頭就啱哂!
第一吓入到嚟個感覺都幾近JCCAC,
呢度係一個青年旅舍,
平均一間雙人房一晚都唔駛$680-$780,
如果床位就仲平,只係$200!
我唔係嚟租房所以我就冇入去打攪啦,
我就去咗右手邊嘅呢個生活館。
呢度記錄咗石硤尾邨嘅歷史,
對於咁細個嘅芊梗係唔會明啦。
一入嚟門口就見到呢個立體背景,
一班街童坐係街邊,
正正顯出當年的景像,
所有小朋友只要有粒波子都可以玩一日。
轉過咗右邊就見到一條巷,
左右兩邊都陳列出唔同嘅歷史物品同資料。
一蚊紙呀!
連我呢塊老餅都未見過。
其實呢度都算係半個歷史博物館,
呢度有好多好懷舊嘅嘢!好鍾意呀!
唔知芊芊係咪真係以為有個氹氹轉喺度,
所以遞起隻腳想爬上去玩!哈!哈!哈!
香港以前真係有水喉管放喺公園度俾小朋友坐同玩架,
唔好以為剩係「多啦A夢」先有呀!
喺個水喉管裡面播放住影片!
呢度既展板有好幾個㝫,
放隻眼埋去會睇到d咩呢?
原來裡面播放住Slideshow
睇到以前石硤尾一張一張舊時嘅照片
之後有個門口出去
但係未完架喎原來仲有得上條樓梯去一樓
如果推住BB車嘅你可以搵職員幫手
嘩上到呢層真係好多細個嘅回憶都出哂嚟!
睇完一個又一個既舊式屋邨單位,
跟住就有出口行番落樓梯去地下,
點知又有一個門,我以為真係咁大,
原來落番嚟只係一條路好快咁介紹番近代嘅轉變,
然後就出番去lu…
出番去之後靠右一直行就會嚟到Full Cup
呼吸冰室係menu隔離有幅好大好靚既壁畫
不過呢個睇餐牌既地方真係好細
多少少人同時嚟買嘢食都唔夠企
入到裡面既環境都係好懷舊嘅感覺
然後唔多人真係好好坐好舒服!
我哋揀咗最入面嘅一張枱坐,
咁啱牆上面有個大燈箱寫住「41美荷樓呼吸冰室」
我同妹妹因為今朝剛同媽咪哥哥飲完茶,
所以都未落格,就嗌咗個香蕉船$56,
芊芊本來有少少眼瞓,但聽到有雪榚食就情願辛苦咁等多陣。
終於有啦!我同芊芊一齊去拎個香蕉船,
當然食到好污糟啦!
個香蕉船不錯,好好食!
芊芊好鍾意把遮,我哋食完之後都拎走咗把遮俾佢揸住。
喺呼吸冰室對面有一個士多 mini Stor
我同芊芊行入去打個圈望一望
都係好多(新嘅)懷舊嘢賣啦
後補多幾張相先(因為過多3日我哋同埋媽咪哥哥一齊去多次)
Photo by CANON 5D Mark III, Len | EF 35mm f/1.4L USM
呀劍評分: 7分
呀劍評語: 呢個地方幾舒服又少人,得閒無事過嚟睇吓生活館,嘆番個下午茶!都OK架
美荷樓青年旅舍 簡介
是貫通新舊的代表,從一座建於1954年的早期徙置大廈,活化及改建成129個房間的青年旅舍。這裡匯聚先進設施與香港獨特文化及傳統,為旅客帶來無可比擬的住宿體驗。
地址
九龍深水埗石硤尾邨41座
美荷樓生活館開放時間
星期二至星期日 上午9時30分至下午5時正
逢星期一(公眾假期除外)及 農曆年初一至初三休息
平安夜及農曆新年除夕下午3時閉館
交通
港鐵深水埗站B2出口
電話
3728 3500