對於日本烏冬,大家又認識幾多呢?讚岐?稻庭?一田最近搞咗個夏麵祭,主打嘅係比較少人熟悉,但亦都係日本三大烏冬之一來自富士縣嘅冰見烏冬。感謝BK Milk邀請我哋參加手打烏冬親子工作坊,由日本手打烏冬大師親自教授,而且師傅只留港兩天,實在係好難得嘅機會呀!
事不延遲,每個小朋友都有材料同工具喇!我哋預備好喇!Gogogo~~~
師傅教我哋首先要碌平個麵粉糰,小朋友們都好努力咁整呀!幹爸爹!
晴晴都在外邊為哥哥打氣呀!
碌到咁上下,落少少扑粉,咁烏冬就會打得更加好㗎喇!將啲粉掃均勻在整個麵糰上,跟住又繼續碌平佢啦!
師傅在旁監督,見到小朋友有邊度做得未夠,仲會細心指導添!
麵糰同我哋整開麵包/曲奇果啲好唔同,彈力十足,想碌平佢而且要夠薄,的確係需要多啲力度同耐性㗎!
將麵糰卷住木棒,繼續用力碌。
師傅話我哋果塊差唔多ok喇!yeah~
將麵糰摺成咁樣,就可以攞去切,好緊張呀!
師傅向小朋友講解用切麵條機要注意嘅事項,一隻手揸住把刀,另一隻手要放響部機以外位置,咁先至安全唔會切親㗎!然後就切切切切~ 已經切咗好多條麵出嚟喇!
完成喇!勁有滿足感呀!
將啲麵條擺放靚靚先。
今次工作坊,個個小朋友都好開心,係一次好難得嘅經驗嚟呀!感謝師傅嘅悉心教導!
我哋今晚有冰見烏冬食喇!臨走買埋支鰹魚汁湯底醬油、蒜香油番屋企先!
番到屋企馬上開爐,師傅教烏冬要煮約6-8分鐘。
烏冬煮起就放入筲箕隔水,然後倒落冰水,浸約3-4分鐘,浸完之後,就放番入筲箕隔水。 (呢幾個步驟唔係師傅教,純粹個人喜歡做法)
呢個時候可以調製湯底喇!以1:10嘅份量將鰹魚汁開出,如果比較鍾意濃味啲嘅可以用1:8份量。
將湯底倒入冷烏冬,製成!食番自己製作嘅烏冬,係咪特別好味呢?哈哈!
丫……差啲唔記得落蒜香油,落埋就更加滋味啦!Oishi呢~~
冰見烏冬被喻為第三大手工延展烏冬,手工延展即係拉長麵條過程中完全唔切斷,可以保持麵條嘅風味。麵嘅粗幼度都係唔同嘅,麵身唔一樣就係正宗嘅手延製法,食落真係好煙韌、彈牙呀!
「一田夏麵祭」有500幾款日本麵食選擇,其中50幾款仲要係香港人最鍾意嘅日本烏冬添!買埋醬汁番屋企煮個冷烏冬無難度啦!大家係咪都好想學下整烏冬呢?公眾係可以透過一田嘅facebook page玩遊戲而參加,不過今次招募完咗㗎喇!一田其實都會不定期有不同嘅活動招募公眾參加,咁大家就要留意住佢哋嘅消息喇!
一田夏麵祭「夏・麺・楽」
日期:即日起至2016年8月15日
地點:全線一田超市
網址:www.yata.hk/tch/promotion/noodlefair2016.aspx