香港地寸金尺土，大間啲嘅playhouse已經買少見少喇！聽講愉景灣果度有間playhouse又大又好玩，等我哋一齊入去證實下！
到達喇！入到去第一樣玩咩嘢先好呀？晴朗已經極速入去彈道飛球區，跟住入去囉！依度有playhouse必有嘅彈波機，吸引咗好多小朋友嚟玩呀！晴朗都好落力去執波喎！完全樂在其中。
小心有人響上面射球突襲呀！
「幼兒天地」個專為3歲或以下小朋友而設，晴晴響充氣彈床入面狂跳，睇嚟好好玩咁喎！
坐在大型積木上就好似搖搖床咁！
過埋隔離池塘睇下魚，幾寫意。
第一次見會閃燈嘅滑梯，好受歡迎呀！
另一個遊樂場亦好啱幼童玩樂，有車車坐，亦有畀小朋友捐癃捐隙嘅設施。
木屋仔同機械人，兩款都有小朋友至愛嘅滑梯㗎！
四周望望，發現高高聳立嘅攀石場，好壯觀！不過有高度限制，小朋友要夠1米高先玩得。
攀石場前面係彈床區，小朋友跳得好hyper呀！連我都想玩埋一份呀！
小型高爾夫球場，場內設有多個不同難度嘅區域，練習多幾次就可以成功入洞㗎喇！
呢個攀架邊爬邊轉動，可能要兩個人一齊爬balance一下先掂喎！
朗朗雙眼發晒光！原來被lego區所吸引呀！
彩虹滑梯+黑洞滑梯，挑戰膽量嘅時間嚟喇！
踏足彩虹滑梯之上，好高呀！有畏高嘅要考慮下先好上嚟身體傾側度會影響瀡嘅速度，想瀡得快啲就向前傾多少少啦！
由側面可以望到另一條黑洞滑梯。兩條滑梯都好好玩，黑洞就當然需要膽量大啲啦！
嚟到十分熱鬧嘅兒童遊戲區，預備過三關斬六將喇！
仲要通過玻璃地板！
又有滑梯瀡喇！呢條滑梯幾好玩，唔怪之得朗朗要我陪佢瀡成十幾轉啦！來回咁走，有啲氣咳，唔知有冇幫助減肥呢？
再繼續挑戰障礙物啦！
瀡埋呢條大滑梯就到達終點㗎喇！gogogo~
另一邊廂，晴朗爸爸預備挑戰Air Trek喇！(1.3米或以上先玩得) 登上四層樓之高嘅地方，望番落嚟你都咪話唔驚呀！晴朗爸爸開始挑戰第一part，睇到我心慌慌。總共有9 part，每一part難度都唔同㗎！
好似呢part咁，就得番一條鋼線喇！好恐怖！
每part嘅扶手方法亦會唔同，難度似乎越嚟越高喇！
玩咗大半天，又係時候講拜拜喇！
Epicland佔地14000平方呎，算得上係香港最大嘅playhouse。場內提供適合不同年齡人士玩樂嘅遊戲區、滑梯、運動場、小型高爾夫球場，以至驚心動魄嘅空中漫步(Air Trek)，簡直係由bb、小朋友、青少年以至大人都咁啱玩呀！晴晴響幼兒天地玩咗好耐，入去之前真係有職員會檢視一下小朋友會唔會over 3歲先放行，朗朗就係咁畀職員reject咗，幾失望呀！不過兒童遊戲區都好啱佢玩，不停爬高爬低，又要我陪佢一齊爬、一齊瀡滑梯，冷氣地方都可以玩到出晒汗，放電實在係一流呀！
晴朗爸爸入場之後猶豫咗一陣報唔報Air Trek，結果都登記咗！好多人排，食完飯都未輪到佢玩。如果大家有膽量玩嘅話，記得要盡早去登記喇！晴朗爸爸玩後感：「上到去真係好高，而且會感覺到個台有啲搖晃震動，好似唔多穩陣咁。每完成一part之後都好想放棄，心理壓力好大。但前面個小朋友都得，冇理由我唔得㗎？玩完呢個真係值回票價呀！」。結果完成晒所有難度階段落番嚟！出去抖過氣平伏下，心情先能夠回復正常。
自己組團達30位小朋友就可以$130/一大一小嘅價錢 (額外成人$70/位) group booking㗎喇！如果租旅遊巴入去嘅提早一星期交旅遊巴資料畀Epicland幫忙申請permit便可。不過要提提大家！負責group booking啲職員唔會太有主動性，需要自己跟貼啲。而Reception啲職員態度亦有啲欠缺，經驗話畀大家知最好先填好場地要求嘅agreement，去到嘅時候一個家庭跟住一個家庭排好隊向職員遞交agreement再戴手帶入場，咁就可以避免混亂喇！
場內職員服務相對好好多，我哋都玩得幾開心！快啲嚟Epicland感受一下全亞洲最大嘅巨型滑梯，仲有奇妙壯觀嘅探險世界啦！
EpicLand 歷奇王國
地址：香港大嶼山愉景灣愉景北商場地下G31
營業時間：上午9時半至下午7時半
費用：
星期一至星期五－$148/一大一小 (兒童為1-12歲)，額外成人(13歲或以上) $168/位
星期六、日及公眾假期－$188/一大一小 (兒童為1-12歲)，額外成人(13歲或以上) $200/位
(入場者須帶上手帶，全日可自由進出)
電話：2441 0098
