普天同慶嘅聖誕節又嚟喇！每年聖誕，我哋都好鍾意入主題公園感受節日氣氛。今年海洋公園嘅聖誕活動好豐富！鍾意去玩嘅朋友又點可以錯過呀？快啲跟貼啲，跟住一齊嚟「聖誕全城HOHOHO」啦！
去玩！去癲！嚟Ocean Park！晴朗知道可以去海洋公園，之前一晚好早就上床瞓覺喇！一朝早大家都朝氣勃勃，心情特別興奮呀！
入園後第一件事就係去海洋公園其中一個景點──「怡慶坊」。
去睇「超時空魔幻匯演」！超巨型LED科幻舞台，加埋燈光同舞台效果，十足十去咗紅館睇show咁呀！
事不延遲，魔術師在台上大玩小把戲，先同觀眾來一個熱身。玩完啤牌又玩繩索，魔術師技術精湛，加上幽默風趣嘅談吐，牽起連場笑聲。
魔術師仲會同台下觀眾互動添！大家都按住指示用手夾住個鼻，好搞笑呀！
變幻莫測嘅魔幻匯演一觸即發！魔術師在煙霧瀰漫嘅玻璃箱中突然出現，呢種出場方式簡直令觀眾嘆為觀止。
懸浮術表演亦都十分精彩！明明係冇嘢扶持，點解可以飛起㗎呢？都仲未想得通，魔術師亦都雙雙起飛，太神奇了吧！
晴朗睇到眼都唔眨，唔知佢哋睇唔睇得明呢？不過唔明都好正常，明嘅就做咗魔術師啦！一幕幕精彩嘅表演，掌聲不絕。魔術師最後變出一把巨型扇子為表演畫上完美句號，好犀利呀！
接住落嚟！輪到極速變裝上場！佢哋擁有超凡嘅神乎奇技，過程中換上好多件華麗服裝。
除咗魔術，亦有高難度動作表演。箍住頸一直打圈吊上去，睇到我哋目瞪口呆！家庭觀眾切勿模仿。
驚心動魄嘅火籠逃脫嚟喇！
最後一幕嘅齒輪車係熱切期待嘅重頭戲，演藝人員合力將魔術師推入車內，魔術師好唔願意仲大嗌：「NO!」
齒輪邊轉動邊降下，好快就會將魔術師鋸開一半喇！我哋都睇到入晒神，究竟魔術師會唔會有事呢？鋸完之後，揭開車箱，魔術師已經唔見咗！
在場觀眾由緊張心情變換為笑容滿面，好戲在後頭！魔術師由觀眾席後方高空而下，觀眾不斷喝采歡呼，精彩絕倫！觀眾讚嘆不已！掌聲不絕，好精彩呀！
多位國際知名嘅魔術師同台獻技，每一位都互相配合得天衣無縫，真係一場GOOD SHOW！
魔術表演在超讚嘅舞台效果配合之下，每一幕都好難忘。呢場唔只係魔術表演咁簡單，包括咗音樂、舞蹈、燈光等效果。觀眾不停拍掌，大家都全情投入表演當中。係一次超凡體驗嘅魔術旅程呀！
睇完緊張刺激嘅魔術之後，晴朗見到巨型聖誕樹都十分興奮雀躍！聖誕樹夜晚會有光影聖誕亮燈儀式，如果好彩仲可以同聖誕老人一齊主持儀式添呀！
演藝人員對工作好有熱誠，合照之餘仲同晴朗傾計，為我哋愉快啲旅程增添了不少歡樂！
巧遇「小紅熊」，好可愛呀！影完相仲要big hug一番，小朋友嘅快樂就係咁簡單。
五臟廟鼓聲響起，又係四出搵食嘅時候喇！海龍王餐廳同冰極餐廳都試過，今次就試下大熊貓餐廳啦！環境都幾舒適喎！等待食物期間，我問晴朗如果魔術表演中放咗晴朗爸爸落去齒輪車咁會點呢？好殘忍呀！佢哋唔識答，靜係識得不停笑！
嘩！熊貓包包好可愛呀！連白飯都做埋海豚形狀，小朋友一定鍾意啦！
食飽之後，欣賞咗一陣雜耍表演。好佩服佢哋永冇失手嘅雜技，台上一分鐘，台下十年功！勁呀！
聖誕期間到處可見聖誕佈置，一定要同Happy Snowman影番張合照啦！
去海洋公園唔搭番轉纜車點算來過呀？由二人變四人，將海洋公園帶畀我哋嘅歡樂一代傳一代。唔知有冇機會三代同堂再影過呢？
原來由高空望番落去巨型聖誕樹仲靚喎！夜晚亮燈後，在浪漫嘅飄雪之下，聽住「聖誕樂韻頌」，一定好有氣氛啫。
朗朗自細已經好鍾意樹熊㗎喇！嚟親海洋公園實會去探下佢哋。
不過每次見到樹熊都係瞓咗覺，反而跳跳紥嘅袋鼠就十分精靈，仲有會唱歌嘅小鳥添呀！
臨走不忘入去禮品店買番幾件心頭好帶會家。聖誕期間仲會有特別設計嘅聖誕精品賣，聖誕造型公仔係期間限定㗎！配合番魔幻主題，仲可以買埋魔術道具同DVD添！簡單易學嘅小魔術，小朋友都可以成為小小魔術師啦！
海濱樂園廣場變身為聖誕奇異花園，一系列嘅巨型樂器樹塑打造得維肖維妙。仲會有世界級真人雕像街頭表演添！
想同聖誕老人影相，就要留意住聖誕老人樹屋喇！佢隨時會同精靈一齊出現㗎！
聖誕限定美食：聖誕節特別多美食推出，好似海龍王餐廳同冰極餐廳就會有「魔幻聖誕大餐」同「HO HO HO海洋列車」聖誕兒童餐。而水都餅店亦都有聖誕曲奇餅同薑屋曲奇提供，係咪好吸引呢？小朋友見到實鍾意啦！
「聖誕全城HOHOHO」除咗有全新超時空魔幻匯演，仲有一系列精彩豐富嘅聖誕活動。好似企鵝出巡咁，舞蹈員會穿上企鵝裝束沿路表演彈跳高蹺和花式雜技，仲會大派糖果添呀！潛水員亦會穿上節日服飾，同海洋奇觀嘅魚兒一同暢泳。小朋友一定要到威威天地玩激光迷陣，考考身手，爸爸媽媽仲可以一齊穿越重重難關添！好好嘅親子時光，一於帶埋小朋友嚟海洋公園過聖誕啦！
海洋公園聖誕全城HOHOHO
活動日期：2016年12月17日至 2017年1月2日
網址：按此
