自從上次為JOBSjunior拍攝宣傳片扮演過消防員之後，朗朗就愛上咗消防員呢份職業喇！對於消防員一切有關嘅資料都感到好有興趣，有見及此，不如去一趟滅火輪參觀啦！
葛量洪滅火輪曾經為香港進行過多次海上救援工作，而家已經光榮退役，改裝成為展覽館喇！船上嘅消防設備同房間仍然保留著，展覽館以海上消防歷史為主題。事不延遲，我哋馬上登船睇下囉！
滅火輪附近設有波浪形水池，似乎係想形造番航行時候嘅海浪，可見設計都花咗唔少心思。
通過小橋便到達滅火輪，晴晴同爸爸快人一步上咗船，樣子幾咁得戚？心情一定好興奮啦！等埋我呀！
展覽館位於鰂魚涌公園，靠在海濱沿岸，響呢度仲可以欣賞埋維港景色，一舉兩得！哈！
紅色嘅係消防栓，用嚟撲救船上有可能發生嘅火警，要配合埋消防喉用先得㗎！
透過潛望鏡，可以睇到機房內嘅兩部柴油主機，晴晴都好雀躍想望下呀！
不如我哋逐間房睇下囉！第一間參觀嘅係餐室，消防員就係響呢度開飯㗎喇！
由此路落去就係船員休息室喇！
滅火輪就好似一間流動消防局咁，消防員每間當值24小時。休息室係畀消防員當值日使用嘅！有6間房，每間都有上下格床。
洗滌室設有廁所、洗手盆等設備。而廚房就有廚具、煮食爐，仲有餐具。唔知佢哋每餐係食啲咩㗎呢？
船頭同船尾都有兩個通風口，係一組活動裝置，可以因應唔同嘅風向而轉動，令船艙內嘅空氣保持流通。
呢部係尾錨機，當船響海面拋下船錨嘅時候，為免船隨風或海浪擺動，就會用佢嚟拋下尾錨，用嚟固定船嘅位罝同方向。
救護室有擔架、床、藥箱等設備。
嚟到呢間房，可以透過膠地板望落船艙，好得意呀！不過如果有畏高嘅朋友就要注意喇！
呢間係辦公室，有枱、有梳化，如果消防員入晒嚟開會都幾壯觀喎！
通過船頭嘅樓梯可前往救火層甲板。嘩！有大火呀！晴朗消防隊正為火警射水！
當消防員需要去較高位置灌救船火嘅時候，就要上去水炮高台喇！不過控制室同水炮台無開放公眾參觀，所以就響呢個角度欣賞下啦！
我哋又長知識喇！Yeah!
參觀完滅火輪，到最下層仲多資料睇。船尾個螺旋槳好巨型呀！
消防用具展示。
葛量洪號嘅模型，朗朗睇到流晒口水，如果可以帶番屋企就好囉！
由於舊式滅火船無論裝備、航速同射水量都好難應付複雜嘅救援工作，就係因為咁，葛量洪號就誕生喇！葛量洪號嘅海上救援包括咗大小船隻嘅火災、颱風襲港期間嘅海上災難以及飛機事故墮海等工作。
第一次咁近距離去望一隻船嘅船底，覺得自己好渺小呀！船頭位置嘅刻度同船錨都清晰可見。
參觀完畢，要離開喇！回程嘅時候，不妨多留公園一陣，享受大自然風光。
未有「葛量洪號」滅火輪之前，香港只有小型嘅滅火船。「葛量洪號」嘅出現，標誌住滅火輪隊伍響質量方面嘅提昇。
「葛量洪號」服務至2002年光榮退役，確實為香港服務咗近半個世紀，而家已經由「精英號」滅火輪取代喇！
「精英號」嘅排水量有六百多噸，配有電子自動滅火系統，水炮射程達150米，主要負責撲救發生響大型船隻嘅火警。係現時最先進嘅世界級專業滅火輪嚟呀！
展覽館除咗帶畀我哋香港海上救援歷史嘅認識外，仲可以實地登船參觀唔同嘅設施同設備，真係大開眼界！能夠滿足朗朗對消防員知識嘅求知慾之餘，我哋大人都識多咗嘢，可算係一個親子閒遊嘅好去處呀！
葛量洪號滅火輪展覽館
地址：香港鰂魚涌公園內
開放時間：星期一、三至日 上午10:00~下午6:00
*聖誕節前夕及農曆新年除夕：上午10:00~下午5:00
*星期二 (公眾假期除外)、農曆年初一及二休館
費用：免費入場
