台灣繪本畫家「幾米」，大家都應該聽過啦！有啲朋友可能已經對佢嘅作品十分之熟悉。雖然我哋冇咩接觸過佢嘅繪本，但一向都好欣賞佢嘅畫作。不如一齊走進幾米公園，探索幾米嘅繪本世界囉！
幾米公園位於原本廢棄嘅鐵路局舊宿舍區，響宜蘭火車站旁邊，過條馬路就係喇！
長長嘅列車懸掛在半空中，幾米世界之旅隨即展開~
小男孩和小女孩一起等車，好幸福嘅感覺！但晴晴卻走埋去問：「點解等咗咁耐都未有巴士嘅？」，真係大殺風景~ XD
好大片草地畀小朋友任跑。好舒服、好寫意！童年係應該要咁樣過加嘛！
沿途見到嘅畫作令我哋停下腳步細味欣賞。點解啲貓貓會困響鐵籠裡面嘅？
哦！可能係因為啲貓貓太頑皮，搞到通處亂糟糟，所以咪要懲罰下佢哋囉！
快啲過來幫手拎行李啦！「哎哋！太重喇！」
我哋都陶醉於幾米故事中……
《向左走 ‧ 向右走》嘅「向右走小姐」到底會唔會響宜蘭再次相遇「向左走先生」呢？睇嚟呢個答案永遠冇人知！不過拉行李順便拉埋我啦！腳骨力都慳埋！唔該晒！XD
「向左走先生」原來響呢邊呀！不如我幫你手拎啲行李丫！hehee~
入到嚟呢度，就好似置身響海洋世界一樣！一齊游水暢泳囉！
《地下鐵》嘅行李箱散落到各地，快啲幫手接住佢啦！
今日shopping買咗個新包包，漂亮嘛？
坐上嚟啦！順便載埋妳喇！「唔該晒哥哥~」
晴晴下次再嚟幾米公園可能已經長大好多，好難得嘅回憶呀！
路過郵筒，晴晴提議寄封信番香港。好呀！但係邊度買郵票呀？XD
《星空》嘅飛天空車帶你睇盡美麗風景，夜晚亮燈後原來仲靚呀！
幾米公園原本係廢棄咗嘅空地，經過重新規劃建設之後，就變成咗一個富有藝術色彩嘅公園喇！到處都見到幾米場景整成嘅裝置藝術，全部來自《向左走 ‧ 向右走》、《地下鐵》同埋《星空》等三本繪本。雖然未睇過繪本，但感覺就好似置身其中，成為咗故事嘅一份子咁呀！踏進公園，好自然會放慢步伐，細味欣賞。感覺好悠閒自在！無論你係唔係幾米粉絲都好，嚟到呢度，都一定會舉起手機大玩selfie，樂在其中。從想像走進現實，真係有鼓衝動想買晒三本繪本同晴朗親子共讀，回味一下在幾米公園嘅想像同記憶呀！
「歡迎大家與藝術裝置合照，藝術裝置僅供觀賞，請勿碰觸或拍打，以免損毁作品。」
弊加火！我哋臨走先見到呢句提示添！好明顯做咗一個錯誤嘅示範。不過在場嘅旅客拍照時都會忍唔住輕觸展品，相信大家都係因為太喜歡故事人物同物件嘅緣故啦！所有展品都設計得咁有心思，大家都要好好愛護佢哋呀！
幾米公園
地址：宜蘭縣宜蘭市宜興路一段116號
營業時間：全天候開放
相關閱讀：
