特別報告！特別報告！聽講宜蘭市梅洲二路有多間特色嘅觀光工廠與餐廳，去囉！去囉！但據聞我哋即將去果間有好多「妖魔鬼怪」！做好心理準備未？自認大膽嘅你，跟住嚟啦！到達山寨村嘅門口，已經見到好多「鬼怪」嚴陣以待。你仲敢唔敢入去？
入，當然入啦！去許願池祈個福先~
經過妖怪訓服場，見到佢哋畀繩綁起咗，好可憐呀！
山寨村地方好大，飄揚嘅旗幟，加上大紅長燈籠，好有氣勢！
門外嘅一對對聯「此路是我開，此樹是我栽」霸氣十足，我哋即將要進入妖怪嘅巢穴喇！
嘩！呢隻紅色嘅係咩嘢嚟呀？手揸住麵包，莫非係嚟同人類爭食物嘅妖怪？企響佢面前，我哋變得好渺小~
內裡原來有間麵包店，售賣蜜糖吐司、即製pizza，仲有各式各樣嘅麵包~
另外，亦有一啲當地嘅特產，可以買嚟做手信。而最吸引晴朗嘅，就係呢度啲玩具喇！
隔離係一間餐廳，叫咗嘢食未嚟！不如出番去行下玩下囉！既然有窯烤麵包，不如就學下點搓麵粉先啦！
但係點解支木棍黐實咗啲麵粉嘅……？因為只係裝飾嚟囉！
晴朗已經各自搵到啱玩嘅嘢喇！
過三關，你同我都玩過啦！但係想贏唔係咁容易㗎！
呢部又係玩咩㗎？
哦！要將粒珠珠碌到去終點，都好考手眼協調喎！
搖...搖....搖小船，海盜船好刺激呀！
啱小朋友玩嘅又點少得旋轉木馬？
仲有車車呀！
玩咗咁耐都肚餓喇！快啲番入去食嘢囉！
櫻桃鴨pizza - 又食櫻桃鴨喇！不過今次唔係紅樓嘅鴨壽司，而係鴨pizza。勁多芝士！好濃郁嘅芝士香。鴨肉同其他配料好夾，好味呀！食咗兩件仲想再食，番到香港食唔番㗎喇！
現炸洋蔥圈 - 看圖已經可以不解釋啦！每個洋蔥圈都炸到金黃色，外面脆卜卜，內裡嘅洋蔥香味四溢，熱氣都唔理喇！
馬鈴薯薯條 - 呢味肯定係老少咸宜啦，唔駛介紹~ 但新鮮炸起嘅特別好味呀！
赤鬼漢堡(櫻桃鴨口味) - 我哋叫嘅係20cm，佢另外有70cm揀，咪長得好誇張？法包包住芝士+生菜+鴨肉，呢種原本覺得冇可能嘅中西合璧，卻再一次發生。宜蘭嘅櫻桃鴨好味就毋庸置疑㗎喇！但估唔到同芝士、生菜都咁match，味覺極之滿足！
櫻花蝦炒飯 - 整到金字塔形狀嘅炒飯好特別！用蔥、蛋同醬油炒起，飯粒粒炒得夠乾身，加咗啲乾蝦皮，口感就份外豐富喇！
關羽茶 - 用呢款茶杯+茶壼飲茶別有一番風味，唔知仲以為我哋拍梗武俠片添！好有特色！
又pizza又薯條，好豐富！今餐啱晒晴朗食啦！
我哋就響啜住奶咀嘅bb鬼之下，享受咗一頓豐富午餐。呢度環境寬敞舒適，如果唔趕時間可以慢慢坐，慢慢品嘗呀！
呢度啲玩具都幾特別，晴朗又有新玩意喇！
窯烤山寨村啲鬼怪令我諗起細個睇過一套卡通片-「鬼太郎」，唔知大家有冇同感呢？村內所有裝飾同佈置都好有特色，尤其係各個妖怪造型都相當吸睛，真係好似置身於一條鬼怪村咁呀！餐廳外有好多啱小朋友嘅遊樂設施，實唔會悶親佢哋啦！最驚喜嘅係呢度啲嘢食好好味！食到晴朗都不停話要添呀！臨走去洗手間有重大發現，佢哋啲座廁全部係自動式，即係有清洗pat pat功能果啲款式呢！多數響酒店先會見到，餐廳都係第一次見咋！
店舖除咗麵包外，亦有玩具同一啲特產賣，係最後購入手信嘅好機會呀！因為趕住去機場，所以唔係影咗好多相，要留待大家去參觀時慢慢細看及發掘更多有趣地方喇！嘢食好味又啱小朋友玩，呢度可算係台灣人嘅親子消閒好去處。大家都一齊嚟從妖怪手中搶回麵包，展開一場大戰囉！
窯烤山寨村
地址：宜蘭縣宜蘭市梅洲二路140號
電話：03-9289933
facebook: https://www.facebook.com/窯烤山寨村-194812624026413
