每次計劃澳門行程嘅時候，都好鍾意安排時間到Playhouse玩。小朋友可以放電之餘，大人又可以鬆一鬆、抖一抖嘛！
今次我哋就去咗開業未夠一年嘅Q立方王國，為大家深入探索一下有咩嘢玩！Q立方王國位於澳門巴黎人酒店之內，佔地1,858平方米，除咗有室內遊樂場，仲有戶外遊樂區！
我哋特別安排咗平日朝早嚟玩，冇假日咁多人嘛！事不延遲，ACTION囉！
嘩！一入到去首先見到嘅係幾艘太空船，好巨型，好有太空Feel。連大人都覺得龐大嘅太空艙，小朋友更加覺得超巨型啦！太空艙內設有唔同嘅攀爬架、滑梯、橋樑、秘道等等，極具挑戰性，好啱好奇心重又富有探索精神嘅小朋友呀！
晴晴同好友都急不及待要登船喇！GO～GO～GO～
登入太空艙後，頓時化身成為小小太空人，摛高摛低又瀡滑梯，好似真係去咗無重狀態咁，服咗佢哋喇！
大空艙隔離嘅樓梯去邊㗎？一齊上去探險囉！~
通過幻彩樓梯同驚險吊橋之後，到達終極長滑梯。晴晴見到已經避之則吉，講到膽量都係男孩子大啲喎！
We~~ 話咁快就瀡咗落嚟喇！好玩！朋友仔不停話要Encore呀！
如果行樓梯上到去發覺唔想玩長滑梯，亦可以通過空中秘道返回太空艙㗎！
秘道位於高處，如果有畏高嘅話望落去都驚驚哋！但小朋友「勇」字行頭，乜都唔驚，仲玩得好開心添呀！
行完秘道再過橋，通通都冇有怕，果然擁有男兒本色，好man喔～
We~~ 瀡完一條又一條滑梯，精力無界限，做小朋友真開心！
嚟到專為五歲或以下小朋友而設嘅波波池，我哋掹車邊仲可以入去玩喎！XD
係咪每個小朋友見到波波池都會笑到四萬咁嘅口呢？睇見佢哋玩得咁開心，我都忍唔住要玩埋一份呀！XD
玩完波波池，可以過埋隔離個攀爬架度玩，啱晒鍾意捐癃捐隙嘅小朋友啦！
啲豆叮捐咗入去左穿右插，應該暢通無阻，但係大人入咗去會唔會塞唔番出嚟㗎？
好朋友入到去玩到忘晒形，完全係通山跑、到處爬，難為咗佢媽媽追到索晒氣咁影相囉！辛苦晒！XD
又可以瀡滑梯喇！Yeah!!! 到底瀡過幾多條滑梯？又瀡過幾多次？已經數不盡！不過瀡極都仲咁好精力，呢樣先堅喎！真係越玩越Hyper呀！
晴晴就比較鍾意玩啲靜態啲嘅遊戲，好似呢部互動投影機咁，要考眼明手快過每一關㗎！採走晒啲蘑菇先得！踩踩踩~~~
跟住就幫汽車填上顏色，遊戲簡單易明，唔駛教佢哋已經知道點玩喇！
去到呢關就要彈奏樂曲，睇佢哋亂彈一通就知音樂天份有啲欠缺，定係我唔識得欣賞~@@'''
繼續去玩啲靜態遊戲囉！多塊益智遊戲板可以令小朋友動動腦筋、考考智慧，晴晴同好朋友都玩咗好耐，又幾有耐性喎！
知唔知點解我哋玩玩下走咗去換拖鞋呢？因為要出去戶外區玩丫嘛！Gogogo~
嘩！女孩子最愛嘅旋轉木馬呀！冇人排隊嘅？馬上去玩囉！
好爽呀！想玩就即刻可以玩到！而且仲要玩完一轉，唔駛再排隊立即玩多轉添！可以玩到夠為止，但其實小朋友又點會識得「夠」呢…？
原來響旋轉木馬位置可以望到巴黎人嘅巴黎鐵塔，好靚呀！攞番個好角度留倩影先~
相片名為「晴晴與好友相約在巴黎鐵塔下」，不如十年後回來同一位置再影過，就咁決定啦！
城堡主題攀爬架暫停開放，好可惜呀！內裡有咩乾坤，就要留待大家去發掘喇！
番到入室內嘅時候，我哋去咗洗手間。洗手間除咗有成人廁格，亦有兩格小童廁所，而且有專為小朋友而設嘅洗手盤，好體貼呀！
我哋唔想孭住個背囊四圍走，所以租咗locker暫存，玩得輕鬆好多~
場內設有多部遊戲機，鍾意打機嘅大小朋友又多樣嘢玩~
仲有Xbox玩添！爸爸們嚟到都唔怕悶啦！
太空艙附近設有舒適嘅休息間，小朋友玩樂嘅時候，家長可以響度攤抖下，瞓響度玩手機都唔錯喎！
小朋友玩到攰又可以坐低欣賞電影，幾咁梳乎呢？
同好朋友一齊睇、一齊笑，快樂咪就係咁簡單囉！
晴晴臨走仲要求玩多兩轉旋轉木馬，差唔多隻隻馬都畀佢坐過晒，超級滿足呀！
Q立方王國有齊室內同戶外遊樂區，小朋友除咗可以響攀登太空艙同波波池區爬嚟爬去、穿梭秘道、無限loop滑梯外，亦可到戶外大玩一番。活力強勁鍾意四圍走又夠膽量嘅小朋友係幾啱玩㗎！晴晴最鍾意玩波波池、互動投影機同旋轉木馬，而好朋友就四圍攀爬、四圍走，成隻馬騮咁呀！平日人流冇假日咁多，所以如果係去嘅最好揀平日啦！唔駛排隊又唔駛迫，玩得輕鬆又開心啲嘛！澳門Playhouse嚟講，呢度唔算係最大，但已經足夠佢哋玩足兩小時冇停過，簡直係精力無界限呀！下次一定要帶埋朗朗再嚟再一齊玩過，玩埋戶外嘅城堡主題攀爬架咁就perfect喇！去旅行就係不停玩㗎啦！可以陪住晴朗一齊共享親子時光係我哋最大嘅目標呀！
Q立方王國
地址：澳門路氹金光大道連貫公路澳門巴黎人6樓
開放時間：每天09:30 ~ 21:30
費用：首兩小時澳門幣$130/一大一小 (已包括室內和室外空間)，隨後每小時澳門幣$60/一大一小，租借Locker 澳門幣$20/個
網址：https://hk.parisianmacao.com/macau-hotel/attractions/qube-kingdom.html
