適逢情人節，人人都會去搵間靚靚餐廳食餐好，或者去商場應下節行下街，再唔係送埋花去海邊吹風或到山頂浪漫一下。但係我哋偏偏去咗昂坪360，行開行埋唔係大媽就係老友記，一對情侶都唔多見，皆因昂坪360開咗個全新360VR體驗館呀！
除咗因為360VR體驗館開幕之外，適逢今年情人節同年初一只差兩Days，所以上到昂坪巿集都充滿新年氣氛。
呀妹知道有得再搭昂坪纜車超興奮，因為佢真係好鍾意坐水晶車廂。
今日風和日麗全日都好好天又唔係太凍，望住窗外面風景真係好提神。
我哋坐嘅呢架車廂，仲係以維港做主題，小朋友見到都零舍開心。
冇人幫手又冇帶腳架嘅情況之下，我居然可以拎住部單反Selfie，連我自己都唔敢相信。
兩個繼續欣賞沿途風景，我同媽咪終於可以抖下氣嘆一陣，心諗可唔可以唔好咁快到。
沿上得高就有D曬，即刻戴番副超擋一擋先。
望落去下面風景起初真係有D畏高，不過習慣咗就OK，唔知將來會唔會有一架全個車廂都係玻璃的全水晶車廂呢？
到咗昂坪巿集，見到都係新年佈置，超有過年氣氛。
在圓形廣場設有新春喜慶行大運巨型新春佈置，仲有個真實纜車車廂可以俾大家打卡放閃。
今次上嚟昂坪360另一主要目的，就係要嚟玩吓呢個新開的「360VR體驗館」，因為依家仲做緊限時免費優惠。
優惠期內可免費試玩4種驚喜體驗
1/ 百變魔衣櫥
2/ 高空索道行
3/ 與胡巴捉迷藏
4/ 光影許願樹
「360VR體驗館」門票要去旅遊資訊中心索取，先到先得。每個時段30分鐘，每段之間有15分鐘休息清潔時間。
裡面採用懷舊香港做主題，配合電影《捉妖記2》同胡巴及其他角色一齊玩VR遊戲。
百變魔衣櫥俾你著上由國際時裝設計師Vivienne Tam設計的《捉妖記2》時裝
呀芊着咗件衫成個小矮人咁好攪笑。
哥哥玩完之後仲過嚟攪攪陣，一出現在屏幕前就搶咗條裙去著。
然後過隔離玩「高空索道行」，先除鞋穿上腳套，再著上預備好的拖鞋，戴上VR鏡後就開始玩啦！
兩個戴上VR鏡後，進入另外一個空間，就喺一條高空索道上。
兩個實際只係走喺一條獨木橋上面，不過真係好逼真，明知係假但係都會被視覺影響。
佢哋仲有個簡單任務就會要切斷VR世界內的汽球繩索。
然後再到隔離玩VR射擊遊戲，在香港街道上搵胡巴出嚟！
孭起個VR裝置，好似「捉鬼敢死隊」。仲有手拎住支槍，不過遊戲裡面係支弓箭。胡巴在遊戲周圍出現，小朋友一定鍾意！
本來個遊戲就唔適合呀芊玩，但係佢嘈住話想試下，結果媽咪就陪佢試玩一轉。
最後「光影許願樹 」俾大家可以拎起道具橙，寫上祝福字句，然後拋上去屏幕許願樹。
呀芊大大力一拋，俾佢掉到上樹好開心。
輪到呀哥寫完掉上樹，點知一掉掉咗上去屏幕上面，真係激死人。不過掉唔中都可以放心，可以在掉過。
半個鐘頭絕對足夠玩齊4款遊戲。
離開咗「360VR體驗館」出到嚟見到一棵仲大嘅許願樹，又一個打卡景點。
如果大家唔得閒去林村的話，上到嚟呢度一樣可以見到咁逼真嘅許願樹。如果在昂坪巿集消費滿$150，仲可以有一塊許願牌，可以祈福祝願。
之後我哋再去埋360舞臺同360動感影院，玩住食食住玩。
消費每滿$200仲可以有攝影服務㗎！
最後我哋去埋食豆腐花。
好食到唔記得打卡。
今個新年一於去昂坪360玩下最新嘅360VR體驗館。
之後我哋仲行埋街Shop下平，估唔到每間店的產品都超有本土特色，以前覺得紀念品一定係俾遊客，但係原來可以好靚，攪到我都大出血。
兩個都用咗自己利是錢買咗自己心頭好！
