一家四口迫喺小巴兩個位!?

Posted on February 28, 2018 By       3,666

11111111111

近排喺網上討論區睇到個post,當堂嚇一跳:有對夫婦各自抱住一個小朋友,坐咗喺小巴兩個位度!唔知係為咗慳返兩個人嘅車錢,定係唔想等下一班,司機提完仲笑笑口扮傻、老老土土咁上咗車……

重點係,兩個小朋友都超過目測都讀緊小三/四,超過一百米有凸。聽講架小巴係去屋邨嘅短線小巴,車費又得嗰$3.5,真係唔明啲人諗咩。咁大個仲畀爸爸媽媽抱住坐,成車都係街坊唔覺得醜怪架咩?唔好彩撞到同學,返到學校畀人笑到面黃添呀。

迫短短地一程車,可能話貪一時方便都唔係大問題。但其實係好危險!睇返新聞:搭超載小巴 保險無得賠,只要小巴超載咗一個人,有咩冬瓜豆腐成車人都冇保險賠。

有好多媽媽都話小朋友三歲搭小巴已開始畀錢,畀佢自己坐。juicy媽都係架,仔仔三歲就同佢嘟八達通。大家坐得舒服啲,又唔使有咩爭執。小巴個位又唔係闊,畀人迫住真心慘呀。

為咗慳幾蚊雞又好,想等少幾分鐘都好,juicy媽覺得都唔係理由。肉唔肉酸都係其次,做人唔可以咁自私架嘛。有網民話:個個係咁,小巴就可以坐32人喇。唔係要遇著一個惡嘅司機,兜口兜面叫佢哋落車先知道係唔啱架嘛。

總之比著我,一定唔會為咁小利益,喺細路面前做出咁差嘅榜樣。幾蚊雞/幾分鐘,同小朋友價值觀,邊有得比呀。

即刻Click入討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
  • 搜 尋
  • APP
  • 網 站
© Baby-Kingdom.com Limited. All rights reserved.