新抱企硬唔畀奶奶見BB……

Posted on April 6, 2018 By       10,842


以前講到好多惡奶奶,當正新抱係妹仔咁使。但原來,而家好多新抱仲惡過奶奶架。事緣Juicy媽喺網上討論區見到有人話見過有啲新抱企得好硬,講咗唔畀奶奶見BB就真係唔畀見。就算奶奶殺到上嚟屋企,都會抱BB出街迴避。開帖網友話呢啲新抱真係好有吉士,仲要老公唔怪佢咁好,如果自己夠膽咁做一定畀老公鬧死。

多數網民認為,一定係奶奶之前對BB做過好大傷害嘅事,先會令媽媽咁樣避之則吉,而且連丈夫都支持。因為喺婆媳版成日都見到無知奶奶餵小朋友食奇怪嘢、搽唔知咩搞到皮膚出現問題之類嘅post。有媽媽話自己個極品奶奶湊住初生BB去打牌,唔帶片唔帶奶,餓就畀佢飲維他奶。真係離晒大譜,咁梗係唔會再畀佢湊BB喇!

有啲媽媽話的確唔會畀奶奶湊,但唔畀望唔畀掂又唔會。將心比己,已經唔係成日見,咁都唔畀都好慘啫。

講返件事,原來樓主都冇話聽過老爺奶奶做過咩傷天害理嘅事,係好寵啲孫,會畀糖佢食,有時帶出街又會整親吓。都係啲長老通常會有嘅問題,唔知點解新抱會討厭得咁緊要。可能係媽媽眼中,呢啲已經係大問題,都唔難理解嘅。

其實新抱企得咁硬,企喺奶奶角度嚟睇都幾心酸!好似明明同住一屋,都講明唔畀奶奶掂BB一隻手指仔,誇張到喺屋企裝cam防盜咁防。嘩!重點係間屋係老爺奶奶名下,搞到人哋生活得咁多制肘,冇嘢呀?睇到呢度Juicy媽都忍唔住爆喇,咁介意唔該就自己搬出去住喇!

其實Juicy媽相信世界上有好多好奶奶,只係上得討論區呻嘅,多數都係講令佢哋火滾嘅事。一個家庭到底誰時誰非好難講得清,如果為咗保護小朋友,新抱企硬又冇咩問題喎!最怕係同食同住又巴之閉嘅新抱,畀我知道嘅話,一定鬧到佢抬唔起頭呀!

即刻Click入討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
  • 搜 尋
  • APP
  • 網 站
© Baby-Kingdom.com Limited. All rights reserved.