2018-04-10

7.7K

【好味有營養】南瓜蕃茄粟子瘦肉湯

話說我地嘅復活節熊本之旅都買左好多蔬果返香港,既然有又靚又新鮮嘅蔬果就當然唔好浪費即刻食佢地落肚,咁就先嚟一個好味有營養嘅南瓜蕃茄粟子瘦肉湯啦~

係呀....我今次去熊本都買左啲瓜果返嚟 (真係買瓜果仲多過買手信...哈哈哈),咁見到咁平又咁新鮮都真係好難忍手嘛。其實初時老公都真係唔多贊成我買,因為擔心空運返香港時會整爛,到時就只係得個"拎"字。不過最後經我揀啲比較生嘅,再用啲衫包得好好先入行李箱,所以最後都安全跟我返到香港。

今次就南瓜同蕃茄先,其實唔止依兩樣瓜果,我仲買左蕃薯、洋蔥、芋頭、士多啤梨同橘子呀~

南瓜營養成份很高,係維他命A嘅優質來源,有防止糖尿病、高血壓以及肝臟和腎臟的病變。而且仲有補中益氣及生肝氣作用;蕃茄有生津止渴及健胃消食功用;栗子養胃健脾,補腎強筋。 (網上資料)

南瓜半個、番茄三個、栗子約十數粒紅、蜜棗兩粒及瘦肉約$30~

南瓜去瓤,然後切厚件~

番茄洗淨後切件~

栗子及蜜棗浸洗一陣~

瘦肉洗淨汆水~

煲內放約1.5L水,然後隨水加入所有材料~

待滾起時,用大火加蓋煲約15分鐘~

之後轉慢火加蓋煲1小時~

最後加入少少鹽調味(真係加少少就好啦),就可以飲啦~

唔知係咪啲瓜果新鮮 (可能又加埋自己帶回港嘅心理因素...哈哈哈),啖湯真係超甜,話咁快就俾我地三口子KO晒成煲湯,小小豬一個人仔都飲左三大碗。依一刻真係有啲後悔只係帶半個返嚟呀!

溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!

【編按:以上內容為作者之個人意見及立場】

相關文章

【牙醫話你知】如何處理牙斑?什麼是滲透式樹脂補牙?

【營養師話你知】不同脂肪對小朋友健康的影響

【跟住小編做媽咪】母乳媽媽唔易做 壓力大到幾乎抑鬱? 私心分享醫院級別奶泵!

【麻疹】6至12個月大嬰兒可提前接種疫苗 1個方法知抗體夠唔夠

緊貼新冠肺炎最新相關資訊