【on.cc東網專訊】 胡諾言(胡仔)接受《東網》電話訪問,透露三仔英文名叫Jayden(其實之前囡囡喺直播度爆咗響口),中文名尚未改好。他直言換消毒服入產房時腦袋一片空白,非常緊張,到見證BB出世時則超開心,又謂兩位女兒亦很期待細佬出世(小編註:睇得出!),大女更攬實媽咪,非常懂事。
小朋友一個重過一個
胡仔笑言三個小朋友一個比一個重,他說:「大女7.3磅,二女7.8磅,依家細仔仲8.1磅添!我冇話畀咩山珍海味佢哋食,但個家庭好開心,BB仔面色紅卜卜,眼好大,頭髮好多,好大聲,呢樣都係我家族遺傳,我同太太講嘢都好嘹亮!大女成日喺學校朗誦架!」
實現晒所有願望
胡仔又自誇剪臍帶愈來愈熟手:「第一次生大女時,老婆唔畀我入去,上次就好似剪牛雜咁,今次有經驗,好快手剪完。(老婆有冇喊?)冇喎!剖腹過程我一直拖住佢,等佢放鬆啲,去到尾段老婆有啲攰,合埋眼,我都好忙,要拎手機、相機,永遠最緊張關頭就有嘢Kick住,但總算順利,多謝醫護人員。(會唔會再生?)肯定唔會,今次都係意外驚喜,老婆呢個年紀叫大少少,有風險,我好佩服佢,佢為呢個家付出好多,我有三個小朋友已好滿足,我曾經有兩個心願,第一係做個成功藝人,第二係有幸福家庭有三個小朋友,呢個已經實現咗。」他表示老婆過幾日才出院,會餵全人奶,自己年底再開工,會抽更多時間陪老婆。
醫生讚叻叻
陳琪受訪時聲線亦很嘹亮,明顯很精神,她表示這一胎佗了37周幾就已生產,而生B時間亦比預期長,但總算順利。講到之前照幾次超聲波都見不到BB正面,今日終於正式見到BB蘆山真目面,陳琪超開心並說:「佢好似大家姐,白雪雪,把聲仲好犀利!佢一出嚟我就叫老公抱BB畀我睇!我今次冇喊,因為心情緊張多啲,生第三胎始終有風險,醫生已經讚我好叻!」