咁搞唔掂喎,11點,再㩒制,呢次要求見醫生,因為肝抽筋,胃酸倒流嘔。醫生都要等嚟,就話開止痛針講明打左生 b ,藥力有機會過俾 b, b出世有機會呼吸困難。我個陣都有呼吸困難,鼻塞,用鼻吸唔到氣,唯有用口吸同吹氣,姑娘見到就話,咁樣好易暈,一定要用鼻吸口呼。好好好,聽話先,照做。半個鐘後,止痛針嚟啦!聽落開心死,其實打完先係惡夢既開始。
如是者,過左2個鐘,有人走埋嚟,我話:好急,想痾屎。佢就話:而家10度啦!你試痾啦!大力啲!教埋痾既姿勢。一 feel 到肚痛,就試痾,無肚痛,就休息。咁又2個鐘。突然間,有人同我講,開嚟開去都係得5毫子大,見到頭髮,但出唔到頭,試埋今次,盡力啲!但我真係盡晒力。佢哋就開始好緊張。突然間,十幾個醫生護士衝入嚟,帶晒儀器。有個人企係我身邊同我講,第一產程宣佈失敗,要開第二產程,要用吸盤,講明阿 b 個頭可能會爆或扁。又要求我簽名。我就話轉開刀。佢哋話個 b 頭落左產道,開唔到刀,靠晒你,媽咪!