節錄
Samuel Lock：對英文，你哋有個錯誤嘅思想，就係「乜都有標準答案」。語文先著重傳意，其次著重點傳得好 –––– 沒有對與錯，只有好與差。換言之，即係無標準答案。你地往往係一樣*無標準答案*嘅野上面求一個標準答案，你話奇怪唔奇怪？
有朋友問我「兩個幾」英文係乜。
老實講，我唔知。不過我當時直覺肯定嘅係「廿幾蚊」可以叫 “twenty-something dollars”。不過如果「兩個幾」係叫 “two-something dollars” 的話，好似又未聽過。
由於呢個問題太有趣，所以我四出去求證。結論係：洋人無「兩個幾」呢個概念。
換言之，無一個「標準」嘅講法。
咁洋人要表達「兩個幾」咪講唔到？
唔會講唔到。佢地可以 *創造* 一個新字！
所有文字都係受制於思想，而洋人習慣用「單字變化」(inflection) 呢種思考模式去表達一個字嘅唔同意思。
"China" 係「中國」，變做 "Chinese" 就係「中國人」。"Brown" 係「啡色」，「啡啡地」就可以叫 ＂brownish＂。
如果某個洋人係用緊呢種模式思考緊的話，佢好可能會彈一句：
“Twoish” ！
「二」係 “two”，「兩個幾」，即係多過「二」，又未到「三」。係 “two” 呢個基礎上作「單字變化」，順口講句 “twoish” ，當「兩個幾」咁解，絕不出奇。"Twoish" 係一個字典無嘅字，不過唔代表洋人會聽唔明，因為佢地都習慣用呢種方法思考。聽到某君講 "twoish" 佢地一定會心領神會，馬上理解到 ＂twoish＂呢個「新字」嘅意思係乜。
當然，你唔好而家無神神走去問個洋人 ＂twoish＂ 係乜，佢實唔明。不過若果配合適當語境，佢地一定會 get 到：
Peter：呢程輕鐵幾錢？
Mary： Well, I don’t know, twoish, I guess.
Peter：Thanks.
“Twoish” 唔係「『兩個幾』嘅英文係乜嘅答案」。因為根本就無答案。或者咁講，答案係乜都唔重要，*重要嘅係你點樣去表達呢個意思出黎*。
你大可以講 “two-something”，係唔會有人咁講，不過配合適當嘅語境，洋人一樣會明你講緊乜。
除左用呢啲「別開生面」嘅方法講之外，你又可以轉個形式講，一樣通：
「大約兩蚊」：around two (dollars).
「多過兩蚊少少」：slightly above two.
不過到底係點講，都唔重要，重要嘅係用一個你認為最好嘅方法講。"Twoish"、"two-something"、"around two" 等等，通通都正確。不過又通通都有漏洞！
“Twoish” 可能喺意思上係最準確，不過佢始終係非正規英文，遇到腦筋無咁靈活嘅洋人，佢地有機會未必明呢種咁「創新」嘅講法。
“Around two” 則夠曬正規，不過同時又係意思最唔明確。 呢個講法可以指「個幾」、甚至「三個幾」，頗唔準確。
「答案」係乜，無錯，係重要；不過識得自己搵答案更重要。你要明白，每一個「答案」，都無你想象中咁穩固，*不是* 非黑即白。更重要嘅係，你要有能力解釋到點解你認為你嘅「答案」係一個好嘅「答案」。語言好多時都唔係對與錯嘅問題，而係你如何取捨嘅問題。
用腦思考，分析各種表達方法嘅利弊，做一個你認為最好嘅選擇。呢個過程無捷徑，要讀通一種知識已經唔容易，要做到 *運用* 呢種知識更難。呢個更加係一個學無止境嘅過程。不過要駕馭一種語言、一種學問，你一定要識咁做。唔好學行捷徑。即係睇果D乜雞精書啊、30日速成啊、或者我講乜，你就信乜。拎起本英文書睇，日日睇。唔好求深，能力未到，急都無用，要循序漸進。睇得多，英文自然好、語感自然好。
我認為你地嘅弊病就係，成日等人講個答案你知，唔識自己去搵答案。即係，自己唔識用腦去思考。未必係你嘅錯，因為我地由細到大都被人灌輸非黑即白嘅錯誤思考模式，唔知道遣詞用字仲有好壞優劣之分。我認為，唔用腦諗野，堅信凡事都「標準答案」係你哋嘅弊病。
用返上面嘅例子，如果有人 *用英文* 問你：「呢程輕鐵幾錢？」。你要答「兩個幾」，你會點答？
諗下。
-
-
-
-
答案在FB有
發表於 
不過就有時粗老d（會寫XYZ )
返回列表
