×

用戶登入

找回密碼 | 註冊


義工

自由講場 今日: 668|主題: 884831

查看: 1457 | 回覆: 10
重溫[霸氣]大劉談點解唔可以[霸氣]地過澳門!!![2013年]


珍珠宮

國民生產總值:31967

BKXmas勳章


發表於 16-11-26 15:49 |顯示全部帖子
本帖最後由 -bella- 於 16-11-26 15:56 編輯






上週五中午,劉鑾雄在福臨門連番「發炮」,指遭有勢力人士迫害,大爆黑幕。其間七情
上面、手勢多多。準備開餐的他,面前放着多隻乾淨碟子。據知有潔癖的大劉,每吃完一
樣食物,就要換碟。


封面故事

澳門大鼻硬搶$600億地皮 大劉:我被強姦


因澳門「御海‧南灣」項目,而遭澳門當局控告賄賂及洗黑錢的華人置業( 127)主席劉
鑾雄(大劉),在該案審訊接近尾聲時,突然高調「發難」。他連續兩日於「御用飯堂」
福臨門高調反擊,七情上面,大爆內幕,並指想將過程拍成電影《張子強與大劉》。大劉
聲稱比舊版勢力大一千倍的新版「張子強」,因睇中塊地的六百億元利益,而「做佢世界
」。扮演「張子強」的最佳人選,應是影星成龍,而「張子強」其人與成龍一樣,有一個
花名,叫「大鼻」。

於法庭內似乎「唔夠打」的大劉,於是移師福記做出連場大龍鳳,其實是「做俾阿爺睇
」,望中央出手擺平。本刊足本放送大劉精彩獨白,並獲知情人士爆料,拆解箇中局勢。
手握黑材料、強調「四歲就開始嚇大、死都唔怕」的大劉,為澳門政府投下深水炸彈,「
張子強」如何拆彈,好戲還在後頭。

澳門前運輸及工務司長歐文龍巨貪案第三階段審訊,因牽涉本港富商劉鑾雄及羅傑
承,而備受矚目。劉、羅二人被指向歐文龍提供二千萬賄款,以投得「御海‧南灣」地皮
,並涉嫌洗黑錢。兩度以健康理由缺席審訊的大劉,早前突然撤換律師團。上週五中午,
大劉在女友呂麗君陪同下,如常到灣仔福臨門開餐。記者上前查詢換律師一事,平日「眼
尾都不睄吓記者」的大劉,明顯有備而來,破天荒即場在福臨門門口召開迷你記者會。之
後再移師樓上貴賓房,繼續「發炮」。翌日又故技重施,加以補充。

大劉以呼寃為名,實為「爆大鑊」,先後以綁架、強姦做暗喻,說到激動處,不惜發毒
誓,指若有行賄或洗黑錢,便「絕子絕孫」。其間,不時欲言又止,刻意賣關子,並貫徹
其一向作風,含沙射影。


外號「大富豪」的張子強,先後成功綁架富豪李澤鉅及郭炳湘,名震江湖,九八年在內地
伏法被槍斃,轟動一時。

「俾人強姦,仲要扮高潮!」

記:記者  大劉:劉鑾雄

記:點解突然換律師?

大劉:有人逼到我走投無路,所以先咁遲去換律師。我擔心有啲律師,人哋講嘢對我不
利時,照單全收,應該反駁又唔出聲。就好像喺電影入面,有啲人係無間道。

解讀:據知情人士透露,大劉首批律師團有部分人,是由「大鼻」介紹,當時二人關係
仍未轉差,他解釋:「初時大劉以為司法機構只係做吓樣俾阿爺睇,後來發現唔對路,已
對本案個別律師有戒心。早前有律師話搵崔世昌(澳門特首崔世安兄長)做辯方證人,大
劉覺得這樣做對自己不利。」大劉並即時換入高大衞( David Azevedo Gomes)。

記:乜嘢人要逼你?

大劉:今年年頭,我喺有線 40台,睇咗套電視劇叫《將軍》。講清末,廣州附近有個縣
,有個地主,俾縣官睇中佢間屋,就用莫須有嘅罪名,將地主拉去斬頭。我睇完,好大感
觸。

解讀:內地電視劇《將軍》一○年首播,由著名演員黃海波、陳數等主演。「將軍」是
指捉象棋,意指「小卒過河,沒有退路,只能將軍」。主角之一虞小白目睹父兄被斬,大
屋被奪,遂手刃縣官報仇。現實中,令大劉惹上官司的,正是澳門「御海‧南灣」地皮。

記:套劇令你有咩感觸?

大劉:我開始諗,應唔應該拍套電影,類似《將軍》嘅劇情,戲名叫《張子強與大劉》
。今日嘅張子強,比以前嘅聰明十倍,有勢力一千倍,佢唔用 AK47、手榴彈,佢用第二
啲嘢去綁架人哋。

解讀:以綁架富豪成名的大賊張子強,九八年在內地落網,判死刑後處決。大劉暗示自
己亦遭澳門版張子強「綁架」勒索。

記:「張子強」逼到你走投無路?

大劉(飲啖茶):我舉個例,戲中嘅張子強,去強姦一個女人,你一定要扮有高潮,先
可以無事走得,稍為反抗、嗌救命,就唔係你死一條命,係殺你全家、誅你九族。佢咁樣
,係要製造一個白色恐怖,我睇啱邊度,你哋個個都要合作,唔係就死路一條。

記:邊個人適合扮演張子強?

大劉(擰側頭思考,身旁的呂麗君偷笑):呃,我唯一諗起呢,就係佢同我一個老友個
花名一樣。成龍有個花名,你問番娛樂組。(記:係咪大鼻?)我唔答你,總之同成龍嘅
花名一樣。

「利益太大,點都要做你!」

記:咁「張子強」勒索啲乜嘢?

大劉(一輪嘴,如背台詞):劇中嘅大劉某年五月俾人告,無幾耐,佢塊地,等同廣州間
大屋,就俾人收咗了。(呂麗君插嘴:講緊故事㗎!)六月,有第三者來搵大劉,話:「
你塊地俾人收咗,依家照成本價,你賺少少,我同你買啦。」大劉一口拒絕。點知,呢班
人隔幾個禮拜又來,話:「如果你肯賣呢塊地,就包你冇罪,甚至撤銷控告。」大劉好
嬲,原來我要俾人告,係俾人吼住塊地。我話:「就算俾人釘有罪,我都唔賣!」

記:對方咁逼你,唔怕一拍兩散?

大劉(沉默):我都諗咗好耐。有人用十幾年的政績和刮埋咁多錢嘅風險,同埋繼續控制
住某個地方幾十年嘅政權發展來賭博,其實係好唔值得嘅。但係,利益太大,講緊唔係三
百億,係五、六百億,所以佢做一鋪,×你!(語氣激動兼爆粗)好過佢做十年廿年,老
虎都要㗎啦。


大劉指連續捱了十多晚通宵,看完內地電視劇《將軍》。劇中,黃海波飾演的主角(中)
,因細膽而改名「大膽」,大劉指自己十歲時的花名正是「細膽」。

首日爆料,女友呂麗君(右)全程陪伴,並用電話錄音,其間不時趨前耳語,提點大劉。

「俾咗贖金,都俾人撕票!」

記:買地時,無預計會落得此下場?

大劉:我當時係俾人呃、俾人氹。我唔想去投資㗎。原本嗌咗另一個有錢佬去投資,但
嗌咗半年佢都唔制。今日呢個有錢佬嘅公司,市值已經二千幾億了。我投資,係屬於捱義
氣。(記:羅傑承氹你落疊?)(大劉點頭,這時呂麗君即上前耳語提點。)我哋唔好講
名。

解讀:有傳嘉華主席呂志和,早年亦有興趣競投涉案地皮,後因條件太辣而作罷。呂志
和旗下銀河娛樂( 27),當時(前稱嘉華建材)市值僅百億元,如今已暴漲至超過二千
億。而四太梁安琪亦有興趣,最終由大劉於○五年借錢予羅傑承的公司 Moon Ocean,買
下地皮,羅其後再將公司轉賣予大劉。

記:涉案嘅二千萬,係咩一回事?

大劉:我喺八年前,俾咗二億(羅傑承的公司),三年前再俾咗十六億,連埋利息,足
足超過二十億。我俾咗咁多錢,我仲要去做啲咁嘅嘢(賄賂)?如果俾二千萬可以慳番二
十億,我咪發?(激動)俾咗二十億,人哋都要撕你票,嬲唔嬲呀?

解讀:華置於○五及一一年,分別支付十六億元,買下羅傑承公司 Moon Ocean。澳門廉
署官員在庭上指,羅傑承一買一賣,共獲利十八億元。知情人士透露,羅只是「 Fund
Manager」,幕後老闆另有其人,他指:「對方已經賺咗咁多,所以大劉初初俾人告時,
諗住有得傾,點會估到對方後來直情想吞咗成個項目,先會反枱。」

記:撕票係咩一回事?

大劉:最近有單嘢,又係俾人「綁架」,交咗贖款,一樣俾人撕票,早兩日報紙先登出
來。我哋所謂撕票,唔係以前三狼咁樣(雙手做勒頸手勢),係……(做口形)。

「御海‧南灣」是華置首個澳門豪宅項目,早於○七年一月,大劉(右)與兒子、華置非
執董劉鳴煒(左),一同出席活動。

解讀:熟悉澳門的人士表示,所謂撕票,即告上法庭。今年五月,結好控股( 64)以
三十二億元,將金都酒店連地皮,賣予銀河娛樂。「有人食咗差價,但賣平咗二十億,都
要將佢啲員工告上法庭,撕佢票。」他表示。上週四,澳門報紙指某酒店高層,涉嫌在申
請外勞時造假而被捕。

「佢視中央如無物!」

澳門幫派「水房」話事人「水房賴」,近日遭加拿大政府驅逐出境。有指他掌控澳門疊碼
仔圈子,為人低調,讓各方人士都心悅誠服。

記:你決定要反擊?

大劉:我唔敢講反擊,我只係升斗市民,惟一可以反擊到呢個「張子強」嘅,係中央政
府。我拍呢套戲,主要係俾中國十四億同胞睇,更希望俾中南海極高層嘅領導睇。呢個時
代,係唔容許有啲有勢力人士,預備世世代代控制某個地方,好像北韓咁世襲。(記:有
無同中央溝通?)我乜人都唔識,我識就唔使喺度同你哋講咁多無謂嘢。

記:你和「張子強」有無私人恩怨?

大劉(想都不想便答):冇,完全冇,一定冇!我都唔知發生咩事,最後先知道,目的
都係嗰五、六百億嘅一塊地。最近逼到我無氣抖,都係想我賣塊地。

「我嚇大嘅,唔怕死!」


記:你和羅傑承已決裂?

大劉:暫時未。睇吓佢會唔會做番一個正常人講嘅正常嘢, so far佢無咩嘢講,但我唔
知道佢突然間接到佢老細嘅 order,佢會點做,我唔知。

解讀:據悉,審訊繼續下去,會有九成證供指證大劉是主謀,因此他急急腳於十月七日
再開庭前爆大鑊。
記:條氣唔順,以硬碰硬?

大劉:我成日希望以和為貴,但發現唔得。一時有人叫我認罪,一時有人話你點都要死
㗎啦,你聽見會點呀?我今日講咁多,已經預咗出街俾人亂刀斬死或亂槍打死。呢個有勢
力人士,講一句話,明,就搵「雪糕佬」搞掂你,暗,就搵汽水廠嘅員工搞掂你!

審訊拖拉講數

大劉這宗行賄案,源於去年四月,在何厚鏵政府內擔任運輸工務司司長的歐文龍,因貪
污案受審時,終審庭法官爆出大劉及羅傑承捲入澳門「御海‧南灣」項目的貪污案,涉嫌
行賄歐文龍,當時大劉否認。但去年五月,二人仍被澳門當局列為被告,之後審訊便拖拉
。初級法院原定去年九月開審,但先因合議庭主席高麗斯身體不適,押後至今年一月;及
後,大劉兩度以健康理由,拒絕應訊,案件再押後。至今年六月,才在大劉缺席下開庭。
法庭一開波便直入審訊劉、羅涉嫌行賄的部分,更傳召華置前職員及測量師樓職員等證人
作供。七月底休庭放暑假,一個月後再開庭,突然轉為集中審訊與劉、羅無關的污水廠貪
污部分。

解讀背後,據知情人士透露,大劉與「大鼻」一直透過中間人進行談判,但對方態度強
硬,以致遲遲未有結果,亦令審訊時間一拖再拖。當中爭拗,在於「價錢」。

華置重金打造的「御海‧南灣」項目,總投資達二百億元。去年三月開始預售樓花,預
計整個項目最後利潤超過二百億,加上近年樓價升值,項目的利益亦水漲船高,自然有人
虎視眈眈。

去年八月,澳門政府已向華置發出通牒,收回涉案的五幅地皮。但知情人士透露,當局
至今未能合法地收回地皮,擁有權仍在大劉手上,「大劉至今投資成本約四、五十億,對
方話加多十億、八億,俾大劉賺,但大劉梗係唔肯,講緊成個項目市值五、六百億喎。」
該名知情人士續稱:「呢班人知道,最簡單直接嘅方法,就係買咗大劉揸住地皮間公司,
再去同政府申請,重啟項目。因為就算政府收番塊地,到時全世界睇住,唔可以再賣俾自
己友,亦唔可以賣得平,唔會係八年前嘅價。所以大劉一日唔賣,佢哋都拿唔到塊地嘅利
益。」如今,華置正就收地一事,上訴至中級法院,未有定案。

由於對方失去耐性,要「夾硬來」。下月七日,便要重啟有關劉、羅的審訊。最近,澳
門有人放風,指要「鋤死」大劉,要劉羅雙雙入罪,若只是羅入罪,檢察院一定上訴。原
本一直沉默的大劉,唯有高調爆料,絕地反擊。

貪污案爆出近一年半,華置密密「賣家當」套現逾六十億元,更曾傳出叫價百億元,放售
旗下商場 The ONE。最近,有傳華置為商場籌組三十六億元銀團貸款。

有「渣甸山大地主」稱號的大劉,持有區內多項物業,包括圖中位於高士美道的白屋。


澳門隨時變天

其實,大劉曾向北京敲門。去年五月,大劉與女友呂麗君便被拍到現身北京,呂手上更
拿着一袋二袋疑似禮物。據悉此行是想透過港澳辦,引見內地司法部門官員,請對方「出
手」擺平事件,但可惜無功而返。炒股出身的大劉,向來甚少與內地官場打交道,求助無
門。

大劉與「大鼻」的惡鬥,當中牽涉的利益及人物,龐大複雜,其他山頭,都不敢出聲,
惟恐被拖下水。近日澳門社會又見暗湧。上月,澳門黑幫話事人「水房賴」,被加拿大移
民及難民部( IRB),以三合會成員為由,驅逐出境。接近澳門政府的人士透露,事件已
升級至外交層次。「中央重視呢單嘢,覺得有人喺澳門嘅勢力太大,連加拿大政府都知道
,嚟緊可能會出手整頓。」近年,水房賴儼如澳門疊馬仔的統帥,去年底便在澳門喜來登
酒店,筵開一百九十九席晒馬。港澳三合會「水房」,正式名號叫「和安樂」,源自一九
三四年,是土瓜灣安樂汽水廠員工,為維護員工利益而成立的組織,故又名「汽水房」。

不過,有「股壇狙擊手」之稱的大劉,亦不遜色。○一年,本刊曾報導,大劉已故父親
劉火榮,是六、七十年代大毒梟「跛豪」(吳錫豪)的好友。大劉指自己「四歲開始嚇大
嘅」,絕非空口講大話。

但講到底,大劉雖大放厥詞,但亦不斷發出和解信號,多次提及希望「以和為貴」,但
指主動權在「大鼻」手上。被殺個措手不及的「大鼻」,相信要重新「計數」,下月開庭
,好戲將陸續上演。

大劉自爆周身病痛,又指「得番半條人命」,說到激動處,左手不停顫動。

平日魄力十足的大劉,在上週五炎熱的天氣下,仍須穿上一襲黑色的風褸到福臨門用膳
。接受傳媒訪問期間,大劉責罵「澳門張子強」時不只動了真氣,兩手更不協調地顫抖着
,見者憂心。大劉之前三度遭澳門司法機關傳召,以養病為由缺席。訪問裡抖震的手,令
外界擔心大劉是否因訴訟飽受壓力煎熬,健康惡化。

本刊找腦神經科專科醫生盧文偉,看過訪問片段後,指出大劉左手活動雖然不自然,但
相信不涉及腦神經疾病,「唔似係柏金遜症,(病人)喺放鬆的狀態都會郁(顫抖)先係
(症狀)……中風都好勉強,如果係中風神志唔會咁清醒。」但大劉患有糖尿病,食藥又
會否影響他的活動?「同糖尿病冇關係……反而飲咖啡或茶,入邊嘅咖啡因刺激會令人咁
(活動不協調)。」盧續表示,更大的可能是當時大劉情緒太激動,體內腎上腺素急升,
所以說話時的手舞足蹈,做出「慣性嘅激動手勢」。

壹解碼 澳門司法制

同案另一被告羅傑承,早於開審時已講明不會親自答辯,但每次開庭都有出席應訊。

澳門司法機關,分別由法院和檢察院組成,前者為「三院三審制」,分別為第一審法院
、中級法院和終審法院。各級法院的法官,是由法官、律師及其他知名人士組成的獨立委
員會推選,再由澳門行政長官任命。至於檢察院職責,是在法庭上代表澳門特別行政區政
府,獨立行使法律賦予的檢察職能。按《基本法》規定,澳門特別行政區享有獨立的司法
權和終審權,法院獨立進行審判,不受任何干涉。

與香港實施的《普通法》不同,澳門施行的是《大陸法》,乃《成文法》,法官只會依
立法原意審判案件,按法典訂明有何罪名並作出相關判刑,不依案例。而香港實施的《普
通法》,法官可援用成文法,也可以援用已有的判例來審判案件,並擁有法律的最終解釋
權,判例對以後同類訴訟有約束力,屬「判例法」。

香港與澳門目前沒有引渡協議,但即使被告人不出庭,澳門法院亦可進行審訊甚至將被
告定罪,只要被告不到澳門或與澳門有引渡協議的國家,便可避免被捕及服刑。













珍珠宮

國民生產總值:31967

BKXmas勳章


發表於 16-11-26 16:00 |顯示全部帖子
如果將這件事與呂小姐的事串連起來,可能真係有好多不為外人知既內情... ...


子爵府

國民生產總值:12995

BKXmas勳章


發表於 16-11-26 16:00 |顯示全部帖子

回覆:重溫[霸氣]大劉談點解唔可以[霸氣]地過澳門!!![2013年]

好長,睇一半


珍珠宮

國民生產總值:31967

BKXmas勳章


發表於 16-11-26 16:07 |顯示全部帖子
日有關大劉既報道:


65歲大劉劉鑾雄早前同舊愛呂麗君發聲明割席撇清關係,連日透過傳媒「溝通」,上周更有峰迴路轉嘅發展,大劉同甘比已入紙註冊,甘比變成準劉太,形容係一生最幸福嘅事,講明婚禮唔會大搞,因為大劉要專心休養(新聞連結:
http://bit.ly/2ggdLIx)
今日有周刊報道大劉嘅專訪,佢就斬釘截鐵咁話甘比係佢最後一個女人,又指甘比唔鍾意物質,大劉覺得甘比令佢最窩心係當時自己喺醫院深切治療部,醫院唔准加床,甘比三日三夜坐喺度用心照顧大劉,亦好悉心照顧一對仔女;大劉喺報道中又話自己有呢個病,一年幾時間要出入醫院,呂麗君只係去過一次探望,逗留唔夠10分鐘,又話劉母出殯當日,呂麗君身穿喱士布料,大劉覺得對方臨尾都唔尊重,大劉又指自己太心軟,一直希望呂麗君會改過,卻變本加厲,大劉任何重要事都唔會畀佢知。
大劉又喺報道指,呂麗君嘅動作,「9千年前已經想到」,又話換腎前,呂麗君日日打去問大劉嘅律師同秘書有關大劉嘅病情,大劉更勞氣話成日想幾時死,諗住搵乜嚟「開波」,律師實話得,因為得唔得都要畀律師費,認為呂只係鍾意聽好說話,又低估咗大劉嘅能力,以為自己好精,佢唔知由嗰刻大劉已經搵「人造衛星」睇實


侯爵府

國民生產總值:23825

BKXmas勳章


發表於 16-11-26 16:10 |顯示全部帖子
我無乜興趣睇他,仲要咁大段字

點評

wcpcelia    發表於 16-11-26 17:57


瑪瑙宮

國民生產總值:138545

2017勳章 BKXmas勳章 畀面勳章


發表於 16-11-26 16:42 |顯示全部帖子

引用:我無乜興趣睇他,仲要咁大段字

原帖由 YEOMORGAN 於 16-11-26 發表
我無乜興趣睇他,仲要咁大段字
X2




寶石宮

國民生產總值:303383

大廚勳章 畀面勳章 BK Milk勳章 BKXmas勳章


發表於 16-11-26 16:45 |顯示全部帖子
太長, 冇心機睇


伯爵府

國民生產總值:16712

hashtag影視迷勳章 BK Milk勳章 BKXmas勳章


發表於 16-11-26 17:40 |顯示全部帖子

回覆:重溫[霸氣]大劉談點解唔可以[霸氣]地過澳門!!![2013年]

本來食住花生睇佢哋,但睇咗咁多日,食花生都食滯,剩係覺得好煩...




珍珠宮

國民生產總值:38955

BKXmas勳章


發表於 16-11-26 18:10 |顯示全部帖子
silly_shan 發表於 16-11-26 17:40
本來食住花生睇佢哋,但睇咗咁多日,食花生都食滯,剩係覺得好煩...

agree

佢越講越覺得佢cheap 同賤。男人之家。

好煩。


大宅

國民生產總值:1103

BKXmas勳章


發表於 16-11-26 20:23 |顯示全部帖子
我覺得佢係嬲呂在澳門一事上辨事不力啫


大宅

國民生產總值:1103

BKXmas勳章


發表於 16-11-26 20:23 |顯示全部帖子
輸咗就咩都賴個女人
© Baby-Kingdom.com Limited. All rights reserved. 有關我們 | 使用條款 | 免責聲明 | 私穩政策 | 廣告查詢
1.香港服務名牌選舉 公民企業嘉許計劃 中小企組別金獎 2013香港資訊及通訊科技獎 匯豐營商新動力 2013 無煙領先企業金獎 家庭友善僱主 社會資本動力獎 商界展關懷 連續五年標誌 碳審計-綠色機構 有心企業 友商有良 全面關懷大獎 無障礙網頁 - 流動應用程式銀獎