婦女醫護今日: 0|主題: 34020

收藏本版

發帖

返回列表

跳至頁

查看: 31952 | 回覆: 52

分享 - 懷孕期間切除畸胎瘤手術 [複製鏈接]

12 3

amipulou

大宅

積分: 2761

1^#

發表於 16-12-23 11:01 |只看該作者 |倒序瀏覽 |打印

本帖最後由 amipulou 於 16-12-23 11:07 編輯

手術喺2年前的今日做，又咁岩見到有人問懷孕期間做手術的問題，所以都想同大家分享下，希望幫到有需要嘅人。

# 情況大概係咁：
懷孕7W做B超，發現有個10CM大嘅畸胎瘤，一直好擔心，睇左好多唔同醫生，有好多唔同意見，好彩比我遇到一個好有經驗又好好嘅醫生，建議我等到懷孕13W時做微創手術割左佢。由發現有BB，到第1次做B超，到到做手術嘅一刻，內心真係好忐忑，一直怪責自己冇做清楚所有檢查就要BB。

# 做手術果一日：
朝早10點入院，手術喺下午2:00做，做手術前會有姑娘確認返所有情況。而由於自己真係好擔心，不停同姑娘強調而家係懷孕13W，希望唔會有任何差錯。由於真係好怕好怕保唔住呀B，喺手術室外邊等嘅時候喊左出黎，姑娘、麻醉師同醫生全都好好，都有安慰我，叫我唔洗擔心，呢D手術其實好普通。但自己緊張到好似個心都跳埋出黎咁。唯有係咁摸住個肚，叫呀B要加油！叫佢一定唔可以走左去呀...

入到手術室，唔知點解見到換左手術衫嘅醫生，個心自自然然定左落黎，突然好安心，麻醉師同醫生話：「好啦，我地而家訓覺喇！」就好安心咁訓左了。到手術完左，喺觀察室，曚曚曨曨有人拍醒我，醫生話幫我分別割左2個瘤，大果個成12CM。我暈下暈下，用盡力氣問醫生BB點，聽到醫生話手術好成功，BB冇事，我就好似暈左咁大覺訓 =)

返到房都繼續訓，到清醒時已經6點幾，等到8點幾姑娘話可以食野，就食D粥水，點知食左一陣間，就大吐左一場，唔知係麻藥反應定還是本身有BB反應。咁一直都未落得床，直至第二日朝早，姑娘幫我抹身，洗傷口等等，到中午試下坐，冇咩大反應就開始可以落床慢慢走動。肚上的3個傷口其實唔係太痛，只係因為走動，間唔中有D血水滲出，反而覺得係自己去小便嘅時候痛感會強烈一啲。（其實醫生有開止痛藥比我，但因為總覺得有BB唔放心食咁多藥，就話出邊3個傷口都唔痛，唔洗食啦，之後我問佢我點解覺得入邊痛，醫生笑話因為你入邊有傷口，所以先叫你食止痛藥，最後還是乖乖吃左幾次，就無咁痛了。）

到第三日，又好似精神返D，姑娘會鼓勵多D落床行，胃口又開始返黎，好想食野。醫生巡房見到我食到野，都好似好開心咁話：胃口咁好，即係冇事啦！

唔知係唔係訓得多，抑或係麻醉嘅反應，第4日開始覺得個膊頭好酸痛，但姑娘話係正常反應黎嘅。

由於做手術後跨左聖誕節，係醫院假期，醫生有特意回來巡房，但唔開診，佢又想我安心，make sure照左BB 無事先出院，所以住左5日4夜（一般情況3日2夜就OK了），等待嘅時間真係好漫長，終於等到可以照BB 嘅日子，見到呀B喺度手舞足蹈，果刻嘅心情真係開心到好似中六合彩咁，勁想錫個醫生一啖！

雖然係微創手術，但始終係有傷口同埋有左BB，個人好累，而我本身已有地貧，有BB貧血情況更嚴重，面色好倉白，所以都係休息休息再休息。一星期後覆診，情況都好OK，咁做手術呢件事就告一段落了。

題外話：
喺手術後，醫生話其實見到我卵巢定子宮旁仲有一個陰影，估計都係畸胎瘤，但由於係懷孕期間，佢覺得唔適合喺呢個時候處理呢個陰影，因為當時子宮已變大，遮住左，又唔想郁到子宮，所以建議生左BB後再處理。

**
以上，係當時超擔心嘅經驗分享，現在BB已經一歲半啦 =) 希望幫到各位有需要嘅朋友，亦希望大家身體健康。

點評

smilingfacee

發表於 17-11-30 12:01

happycat55

發表於 16-12-23 11:59

0 0 0

私人傳訊

amipulou

大宅

積分: 2761

2^#

發表於 16-12-23 11:12 |只看該作者

而喺手術時時發現嘅陰影，我喺生完BB1年後，再返去搵醫生做手術割。呢次無懷孕，情況簡單得多。

同一個麻醉師，同一個醫生。入手術室前無上一次咁多顧慮，同麻醉師、姑娘仲有講有笑，除左有小小掛住呀B，其他一切都OK。

做完手術，反應亦較上次好，無吐，胃口都OK，亦冇上一次嘅膊頭酸痛。住左3日2夜，醫生話無咩事就可以出院了。

做手術嘅時候醫生會打D氣入個肚度以騰出更多嘅空間，而呢D氣好似排唔走咁，上一次可能係有左BB所以唔覺，但今次好明顯，成個星期都覺得個肚好漲，訓喺度都唔會變平咁。

而另一個比較大嘅分別係，上次係有左呀B，好有堅強嘅動力同埋強烈嘅意志，所以做手術後知道呀B無事，其實痛都覺得不是甚麼。但今次情況唔同，成個星期都覺得頭暈、好攰，除左想攤喺度訓覺就咩都唔想做。

之後都有睇過中醫，中醫話其實我身體好累啦，喺1年半時間之內，做手術、生BB、再做手術，所以覺得好累好暈都係正常。

休息左2個星期，感覺就正常返了。