本帖最後由 cforchat 於 18-3-14 11:49 編輯
唔知關唔關年紀大性情變, 狗狗近呢大半年來, 行為好失常.
以前, 每當佢討吃時, 係會靜靜依偎喺腳邊, 然後等我哋餵, 若然唔食的話, 佢只會默默地仰高頭注視我哋, 就係佢呢種楚楚可憐嘅眼神, 搞到我哋明知餵人類嘅食物對佢冇益, 都不得不被佢降服, 務求滿足佢食慾.
而家, 佢一樣會依偎喺腳邊, 但就一啲都唔靜, 一係就喺喉際發出刺耳嘅嗚嗚聲, 一係就索性狂吠, 明明已經唔停手餵佢㗎啦, 都吠到極之吵耳. 有時想話趁吃飯時與家人談幾句, 都被佢搞到傾唔到偈, 搞到我實在忍無可忍要對佢大聲呼喝, 先至稍為停一停, 但唔吠啫, 一樣會發出刺耳嗚聲.
以前, 無論我哋餵佢食乜嘢, 佢都會好溫柔地張開口, 輕輕將食物叼入嘴, 完全唔會咬到我哋.
而家, 我哋好怕徒手餵佢食嘢, 因為溫柔已不再, 換上嘅係飛擒大咬, 生怕稍一遲緩就冇得食, 完全妄顧我哋隻手. 假如用手指拎畀佢食, 佢一嘢就噬落嚟, 好多時都會被佢咬到手指. 以為改用手掌將食物攤開, 斷估範圍大咗, 應該唔會咬到啦, 點知結果都係一樣, 佢猖狂到連手掌肉都咬落去. (其實每餐都畀足份量佢㗎啦, 唔明佢點解好似食極都唔飽) 又由於佢對食物過度敏感反應, 就算隻手只係喺佢面前揚一揚, 佢都以為有嘢食, 張開口就想噬, 搞到我哋而家患咗餵佢恐懼症. (有次吾兒舉起相機, 話要拍我餵狗狗嘅溫馨照片, 點知出嚟嘅效果係狗狗目露青光面目猙獰地搶食, 笑鬼死!)
以前, 每逢打風落雨行雷閃電, 先至會觸動狗狗嘅神經, 令佢因驚恐而周屋竄搵嘢咬, 只要回復平靜, 狗狗亦都會靜下來.
而家, 就算天朗氣清, 外出風平浪靜, 狗狗都會無啦啦去咬物件, 乜都咬一大餐, 膠類紙類無一倖免. 咬都算嘞, 最多將佢咬開嘅位置蓋上布, 等佢冇咬得咁容易, 就會冇癮地唔再咬啦. 點知我哋有對策, 佢一樣有下策, 時不時會轉移目標, 防不勝防. 最近居然染上舔嘢嘅習慣, 窗邊櫈腳牆邊..... 總之唔大塵嘅地方都唔舔, 連木地板嘅隙縫都唔放過, 搞到地板之間現出好多裂痕, 要用膠紙封上, 避免被佢不斷舔而令裂縫愈來愈大. 而家屋企嘅局面, 就好似做戲嗰啲, 將好耐冇人住嘅傢俬用大幅布蓋上嘅畫面.
最搞笑嘅係, 有時見佢瞓到睡眼惺忪, 一起身二話不說就去咬嘢, 都唔知佢係夢遊定係無意識嘅舉動.
其實狗狗可能係無聊先至會做出一啲搗蛋行為, 所以雖然有時覺得幾頭疼, 不過都只係薄責一下就算. 當然佢係完全唔會知錯, 亦唔會改過自新㗎啦, 既然冇佢符, 就當佢係反老頑童, 將佢種種惡行視之為可愛表現. 而遭破壞嘅物件, 就當佢畀機會我哋更換. 至於舔塵封嘅地方, 就當佢提醒我哋要勤於清潔囉.......
唉~~~~~~~
春有百花秋有月, 夏有涼風冬有雪, 若無煩事掛心頭, 便是人間好時節.