本帖最後由 cforchat 於 18-5-20 10:15 編輯
以前無論睇電影或睇劇集, 只要涉及商品嘅畫面, 都會遮遮掩掩.
好似劇中人物如飲汽水, 吃餅乾, 吃薯片等等, 雖然從包裝顏色或形狀, 大約都知道係咩牌子, 但係道具組嘅人員, 一定會用另外嘅物質材料或紙張遮住, 亦盡量唔用近鏡, 唔畀觀眾見到係咩牌子, 以免幫商家賣廣告.
最有印象就係飲品, 明知係飲緊某牌子樽裝或紙盒裝, 但都被白紙遮蓋. 以前唔知, 仲喺度諗做乜要多此一舉, 後來先明白箇中原因.
但係而家嘅趨勢, 好多都增設植入式廣告, 尤其是內地時裝劇更甚.
好多時喺劇中, 間中就會出現商品, 而且仲會特登放大, 等觀眾可以睇得一清二楚之餘, 劇中人亦會幫口宣傳.
例如劇中有人病咗, 親友前往探病, 跟住放低產品嘅同時, 不忘叮囑病者要服用, 強調不僅可強身補健, 亦可加速痊癒, 然後就會嚟個商品嘅大特寫, 畀觀眾睇真啲.
又例如劇中有女士生日, 同樣地親友往道賀, 送上美容產品作為禮物, 不忘推銷產品如何有效保持青春常駐....... 跟住一樣係放大商品.
又又例如快遞公司送件上門, 除咗大大聲講出公司名稱, 亦會乘機宣傳公司嘅運作流程與服務範圍.
最近睇咗一套劇集, 除咗有齊一般商品嘅植入式廣告之外, 居然仲有衞生巾同埋手機遊戲嘅廣告.
本來都算見慣不怪, 不過加插嘅方式, 我覺得有啲突兀.
例如喺一家寫字樓內, 主角們為咗公事嘅紛爭正戰鬥得劍拔弩張, 忽然鏡頭一轉, 前台兩位女孩正在討論月事到卻沒備衞生巾, 跟住其中一人就攞咗包衞生巾遞畀對方, 當然不忘近鏡放大衞生巾啦.
同一場地, 高層剛向前台女孩大發雷霆, 呢頭一轉身, 嗰頭女孩已急不及待在打手機遊戲, 同樣地又係放大遊戲畫面啦. (正常情況下, 啱啱畀人鬧完, 仲邊有興緻玩遊戲呀? 而且仲要即時㖭?)
前台女孩除咗賣衞生巾同埋手機遊戲廣告時才出鏡之外, 根本與整個劇集全無關係, 所以睇睇吓劇集忽然間中出現幾幕呢啲情況, 難免會覺得怪怪的.
至於古裝劇, 劇中出現廣告嘅機會應該微乎其微, 畢竟年代唔同, 冇可能而家嘅產品喺古代已經有㗎嘛. 不過雖然唔出現喺劇中啫, 但係就會以劇中人物嚟賣現代嘅產品.
之前喺網上睇那年花開, 忽然見到某某搞笑地出現. 正覺得奇怪, 呢位某某唔係好嚴肅正經㗎咩, 點解突然會變得咁詼諧呢? 再睇落去, 先至知原來係以劇中人物嘅造型與場景賣緊廣告, 因為將廣告加插喺劇集中途卻全無徵兆, 致使我以為依然睇緊劇集, 所以奇怪點解同樣人物性格會迴異㖭. (後來一見到佢哋又扮鬼扮馬, 我就知道又嚟廣告, 通常都會往後拉飛廣告.)
其實我覺得植入式廣告嘅概念都幾好吖, 至少睇劇時(被逼)順便睇埋廣告. 如果好似以前咁, 有廣告時間, 我係會趁機行開吓, 根本唔會坐定定睇廣告.
春有百花秋有月, 夏有涼風冬有雪, 若無煩事掛心頭, 便是人間好時節.