與t識於微時, 曾經一齊讀書, 一齊工作, 感情要好, 無所不談.
後來先後離開公司, 各自出外另闖, 間中亦有聚會, 一直保持聯絡.
自從佢嫁到外國, 雖然偶有書信來往, 始終天各一方, 佢有佢嘅生活, 我有我嘅忙碌, 通訊又未如今日般發達, 自然地感情漸漸淡下來.
若干時日後, 大家再無聯絡, 當某一天想再聯絡時, 發覺舊有通訊已不適用.
十幾廿年過去, 偶然都會想起佢, 嘗試透過面書搜尋, 可惜遍尋不獲.
直至一次, 共同嘅其中一個朋友發現t曾經捎過一封電郵, 留下咗聯絡電話, 大家即刻急不及待與之聯絡.
我二話不說留言同t打招呼, 佢亦好快傳來一張全家福相片, 佢嘅樣冇乜點變.
相逢後, 我與t同埋另一位共同朋友, 開咗個談話群組, 三個婆仔日日一有時間就喺度車天車地, 乜都講一餐. 我曾經擔心, 日日係咁講, 未來要講足幾十年, 唔知會唔會塞爆群組呢.
期間, t幾次問我攞相, 唉, 你估我好似你哋咁, 隨時可以拎出十張八張相片咩, 我平時都唔鍾意影相, 邊有相喎, 即時自拍效果又唔靚, 咁耐冇見, 我梗係想將最靚嘅一面示人㗎嘛. 得得得, 日子流流長, 有拖冇欠, 總有一日影幀沙龍畀你睇.
一日夜晚, 我哋三人如常閒話家常, t忽然傳來一段文字, 內容大意係話佢平時教仔女唔好同陌生人講嘢, 估唔到自己居然同陌生人講嘢, 跟住拜一聲就離開咗群組.....
初時見到段文字, 我以為佢想分享教兒心得, 但係睇埋佢道別, 跟住離開, 我先至會意過來, 原來佢畀說話我聽, 佢認為我遲遲唔畀相佢, 係屬於陌生人, 所以唔再同我呢個陌生人講嘢.
群組另一朋友見到段文字都打個突, 佢話就算唔畀相都係好小事, 唔需要咁大反應.
當下, 我個心好難受, 唔明點解一分鐘前仲傾得好好的, 一分鐘後就反面走人, 之前毫無先兆, 只為一個莫須有嘅理由就抹殺咁多年嘅友誼.
於是, 我寫咗段文字畀佢, 話佢知, 同佢再重聚, 係全年最開心嘅事, 既然佢唔想繼續, 我亦唔勉強, 保重!.... 跟住就熄機瞓覺.
翌日一早, 見到佢回覆, 佢話識好多朋友, 冇一個好似我咁樣對待佢, 多謝我喎...... 我以為過咗一晚冷河, 會緩和佢一時嘅衝動, 點知仲變本加厲責怪我.
唔通冇相就唔係朋友?
如果係朋友, 係咪應該尊重一下我唔鍾意影相嘅性格?
正如我問你一啲嘢你都吞吞吐吐唔答我啦, 唔通我又話你唔夠朋友喇喎?
大家又唔係未見過面, 來去咪又係咁嘅死樣, 最多都係添咗幾條皺紋多咗啲老人斑啫, 點解咁執意要睇近照? 睇到又點, 睇唔到又點呢?.....
我唔想你一句我一句好似罵戰, 話不投機半句多, 所以冇再畀任何回應, 即時封鎖佢就算.
到咗中午, 共同朋友話t搵我, 想同我傾, 我話冇嘢好講, 並叫朋友唔好夾喺中間, 以免難做.
原來t有打電話畀我, 不過因為係外國來電顯示, 所以被我電話嘅功能截住, 佢留咗言, 話打咗幾次都搵唔到我, 又問我嬲完未, 佢知道自己傷害咗我....
除咗留言, 佢又用其他人電話聯絡我, 想與我和解, 問我可否當咩事都冇發生過.......
其實, 當聽到佢陰聲細氣留言問我嬲完未, 我已經唔再嬲嘞. 但係, 唔嬲係一回事, 同佢和好又係另一回事. 佢咁情緒化, 難保類似情況唔會再發生, 我怕怕, 唔想又成為無理取鬧嘅對象.
以前年少氣盛, 間中有拗撬唔出奇, 嚟到呢個年紀, 又咁耐冇見, 我以為大家應該好珍惜呢段友誼, 畢竟相隔異地, 能見面嘅次數可能在倒數中, 點知全是我一廂情願, 人家根本大把朋友, 唔在乎少我一個.
我同吾兒與當家提過件事嘅始末, 吾兒問我喺邊度識啲咁嘅人. 當家就話, 始終咁耐冇聯絡, 好難回到從前.
我仲喜孜孜以為, 呢段友誼能存在於過去現在將來, 實在難得, 估唔到只維持短短個多月就劃上句號.
最近, 共同朋友聯絡我, 話t返咗嚟, 想約我出嚟聚舊, 我婉拒咗. 既然唔想再有任何連繫, 再見亦冇意思.
曾經, 都憧憬過大家聚首一堂嘅情景, 可惜情懷不再.
春有百花秋有月, 夏有涼風冬有雪, 若無煩事掛心頭, 便是人間好時節.