要小朋友執好自己用過同玩過嘅物件係另一樣家長會覺得幾麻煩嘅事，有時啲小朋友叫極都唔執會忍唔住手執咗先，或者工人姨姨未開口已經幫佢哋執好。要教佢哋執嘢首先我哋家長要好忍得，又要有耐性同埋夠堅持。小朋友天生鍾意玩但有邊個天生鍾意執嘢呢？所以要教佢哋執嘢同佢哋惡、唔開心根本無意思。自細開始就要培養佢哋有手尾，不過絶對唔係一件易事，我哋兩公婆喺屋企都好啲，起碼可以控制到佢哋玩完一樣玩具要放好先玩第二樣，如果唔放好要我哋執就收起無得玩嗰件玩具直至下次肯執為止。但係如果我哋番咗工就慘啲，我記得以前放工番屋企通常都會見到啲玩具四圍放，所以第一件事一定係叫佢哋執嘢，仲要唔准姨姨幫手，不過我哋通常都唔會發火，亦唔會心急，通常都會俾時限佢哋，一般都係我哋沖完涼出嚟前要攪掂。開頭都唔得架，出嚟都未攪掂，通常都要多少少事間，但我哋會等，總知唔執好就無得開電視睇卡通，或者一定要執完先食飯。因為佢哋唯一睇卡通嘅時間就係我哋番嚟之後到食飯前呢段時間，所以要佢哋執嘢係好有效。另外，每一次同佢哋去街前又係訓練佢哋執嘢嘅好時間，先講明幾點會出門口，早四十五分鐘就開始叫執嘢同換衫，試過一兩次唔執或者攪唔掂，終於剩係同執好自己嘢嗰個出街，又係要堅持同唔好嬲，出去一陣再返轉頭，然後又係要好平和咁問佢點解無得去街，試個一兩次之後，每一次出街前佢地都會好快攪掂。好記得有一次叫佢哋執玩具，但佢哋唔係好理，終於我哋同佢哋講話你哋咁多玩具執唔好一定係因為太多玩具，所以將佢哋執唔好嘅我哋幫佢用袋入好，然後話嘅然你哋啲玩具多到執唔曬，咁我哋就將呢啲捐去救世軍啦！佢哋即刻喊曬話唔好，我哋要佢哋道歉之後俾咗一次機會，亦講明下次一定會捐，佢哋即刻收好玩具之後情況亦大有改善。
又係嗰句，要訓練呢啲規矩一定要有耐性，如果要俾後果佢哋亦要知道佢哋重視啲乜嘢，唔好亂咁罰，要同佢哋所做嘅嘢相稱，即係例如唔執嘢就無得出街，無得睇卡通咁。只係打打鬧鬧根本無用。做家長亦要以身作則，同時開始嘅時候要同佢哋一齊執但唔係幫佢哋執好曬，教佢哋放正確位置。要不厭其煩經常提醒，才會慢慢養成習慣。
發表於 
返回列表
