之前政府突然拍板宣佈一個新的強積金對沖方案, 作為一個月入2萬幾嘅打工仔,喺而家工作嘅學校做咗就快7年,加上剛好又萌生辭職嘅想法,覺得呢個方案真係堅離地,覺得好無奈
原本取消MPF對沖,對我哋d打工仔嚟講絕對係一大喜訊。但呢個方案無啦啦將原本僱主需要俾嘅2/3調低到成1/2,問題就大啦。雖然呢2/3唔再好似以前咁,由我哋dMPF度拎出嚟,但如果我真係辭職,我拎到嘅長期服務金就會由原先嘅$105000(我人工超過上限$22500),即時變到只係得$78750,唔好講我d錢其實無少到,只係去返MPF戶口度,入咗去MPF戶口之後,到我65歲嘅時候,剩返幾多錢都無人知啦。而家香港人收入中位數都係$15000到,但物價一d都唔平,好像我咁仲有家庭負擔, 如果辭職後即時少咗幾萬蚊,影響一d都唔細。
唔好忘記,本來長期服務金同遣散費係一種失業援助,用嚟緩解僱員無咗份工嗰段空白期嘅即時經濟困難, 以前個制度用咗有退休保障功能嘅MPF去抵銷呢筆錢,本身就係搞亂咗MPF同長期服務金、遣散費嘅功能, 令MPF變咗畸胎,更加係政府帶頭剝削打工仔。真心好想問, 點解以前用MPF去抵銷我d長期服務金時,僱主就俾2/3, 而家僱主唔用得我dMPF對沖, 要自己拎錢出嚟, 就改到1/2 呢? 其實有d咩根據咁樣做? 係唔係向商家傾斜?
講開對沖,MPF都唔止呢個問題啦。MPF管理費高昂嘅問題,政府一直視而不見,已經令好多人對MPF制度有好多不滿。d基金公司一時又話行政費無得cut,一時又話投資失利蝕咗好多,其實都唔知自己供嘅MPF蒸發去咗邊。而家取消對沖,將錯咗咁多年嘅MPF變返正常都要10年過渡期, 真正嘅全民退休保障又要傾到幾時? 而家除咗生果金真係人人都可以拎嘅,仲有咩所謂嘅保障? 上面已經講咗MPF問題多多喇,而且並唔係所有人都有供強積金,好似主婦咁啦,每日24小時on call照顧家庭,咩保障都無,加上而家slash一族越嚟越多,好多人接job做都未必同對方有僱主僱員關係,d小公司直接計做雜項,唔搞MPF更好,大家都方便。甚至d年輕人為咗唔供MPF,要求出糧出現金,寧願多個錢揸手,好過擺到65歲唔知拎得返幾多。至於其餘嘅退休保障例如醫療服務、安老服務, 而家主要都仲係靠香港人自己「保障」返自己,得到幾多「保障」,基本都係取決於個人有幾多積蓄,唔講其他,如果老咗無錢但需要有人照顧,想住政府津助嘅安老院,分分鐘排到死都未住到。
講全民退休保障,我都已經唔係諗我自己百年歸老時有無得受惠喇, 最多70歲夠資格拎佢千幾蚊生果金,不如靠自己好過,但係呢d措施對我下一代可能有好深遠嘅影響, 真係越諗越心寒。