唔好以為BB嘔奶就真係好平常...我個仔就係中左「幽門狹窄症」剛做完手術康復中。
阿B足月39週出世,6磅幾。第一個月食得訓得,滿月已經飲4安一餐,每4個鐘一餐,重得唔錯。
但滿月之後開始嘔奶...之前係完全無的,而且有趨勢約來約嚴重,一日6餐有4餐都嘔,一次嘔20-30ml, 可以係掃完風之後半個小時到一個小時之後先嘔,嘔出係啲好似豆腐渣的奶,無其他色的。同埋雖然尿夠多,但便便3-4日先一次,墨綠色。嘔時「ur」出來,唔係噴泉咁,但多起身連鼻都湧出來,嚇到我傻... 我個陪月好好,做咗8年呢行,好有經驗,但都未見過BB滿月先開始咁嘔奶...通常都係初生嘔得勁,之後慢慢發育好啲,就嘔少啲... 期間呢個過程,我有試過好多方法,例如掃耐啲風,一餐分好多次掃風,但好多時「ur」曬都照嘔...或者減奶量,少食多餐,但無論食60ml定90ml都係嘔差不多20-30ml出來...轉奶粉,甚至後來轉埋豆奶粉,當然都係咁...期間睇過私家醫生,開咗止嘔水同開胃水,唔work...第一次入政府醫院住院,因為照X-ray照到腸脹,但後來再照又無事出院...
同時,阿B黃疸滿月都未退曬,仲有150,去健康院打滿月針兼複雜,馬上因為黃疸轉介去醫院急診。由於之前因為嘔住過一次院,今次就乾脆黃疸同嘔一齊睇。由於上次無發現啲咩特別,但出院後依然嘔,所以今次醫生做多好多檢查,Xray, 抽血,驗小便,到最後做超聲波,終於確診係「幽門狹窄症」,馬上call兒科外科醫生,翌日做手術... 我即刻喊爆...阿B先得個40幾日人仔,就要全身麻醉做手術...
手術係微創,好在順順利利, 依家佢係病房康復緊,開始慢慢食翻奶奶,希望可以早啲康復出院。所以我趁依家,分享呢次經驗同一啲諗法,希望可以幫到大家,早啲發現問題,早啲對症:多謝Baby Kingdom
呢篇2014年關於呢個病的分享,希望可以繼續幫到大家:
http://www.baby-kingdom.com/forum.php?mod=viewthread&tid=10272356
呢度有篇關於呢個病的具體解釋,大家如果發現嘔奶同時有其他符合的症狀,如黃疸未退等等,唔好猶豫,快啲去急診:
http://www.tait.mohw.gov.tw/?aid=509&page_name=detail&iid=916
唔好輕視嘔奶。連衛生署網站都話嘔奶平常,因為BB「賁門」未發育成熟,所以要掃好風,奶先落到隔,落到胃...但其實賁門係食道落胃的門,而幽門係胃落腸的門。如果BB嘔出來的奶係「豆腐渣」咁,似係已經消化過的,應該就係已經落格兼到胃,但都嘔翻出來,就可能係過唔到幽門,可能係幽門狹窄喇...
黃疸過長未退係可能同幽門狹窄症有關的。
就算陪月真係好好,好有經驗都好,唔可以完全依賴,因為始終佢唔係醫護人員,唔係醫護專業人士。唔好逃避問題,驚就睇醫生啦!
希望分享呢次經歷,可以好似我見到2014年果個post咁,可以俾啲意見大家參考喇!希望大家BB都健健康康!