22W單親媽媽樹窿週記 - sukimama.hk的日誌 - Baby Kingdom - 親子王國 香港 討論區

22W單親媽媽樹窿週記

熱度 8已有 1077 次閱讀 17-3-23 10:20

多謝咁多位JM既支持,同埋你地回覆,留言仲有好多PM既鼓勵,今日正式踏入第22週,今朝起身,又Feel到BB豬伸腳,呢個動作,媽咪等咗幾個禮拜啦,網上見到好多人講,20週咁上下,應該會Feel到BB郁,但等完又等,都未呢種感覺,有啲人又話,其實好輕微,夜晚靜靜地訓低,先可以Feel到BB嘟個肚皮,但我都係Feel唔到.

我有諗過,會唔會我呢幾個禮拜,經歷既嘢,影響咗佢呢?又或者會唔會...好多或者,然後好多如果....唔緊要啦,上禮拜,Check過心跳,照過曬一切正常,有啲嘢,都只可以,坐喺到放鬆少少,等佢自然發生.

第1次Feel到BB豬郁,我覺得好神奇,我同佢,感覺上又再親密多少少,好早之前,一路都有諗,等BB豬郁,我要拖住老公隻手放喺我個肚皮上面,一齊Feel吓個感覺,以為會好溫馨,而家1個人,開住好暗好暗既慳電膽,望住自己個肚,再望望間屋,點解會得返自己1個,然後終於喊住訓著咗.

有JM話我好堅強,其實我唔係,我連搵人傾既勇氣都冇,唔想同屋企人交代,身邊朋友亦都唔會明(我今年26歲,身邊朋友都未結婚),當初太多人睇好我地段婚姻,我阿爸阿媽,仲要覺得我嫁得好多2個家姐,而家我真係唔知點面對佢地,雖然我知我屋企人一定會全力Support我,但呢刻,真係未準備好足夠既能量,同佢地坦白發生咩事.

呢刻,只係想BB豬平安,喺媽咪個肚入面,正正常常咁長大,吸收多啲營養,接收多啲唔同既刺激,我亦盡量唔好將負面情緒帶比佢,不過之前太忙,個腦未開始運作,然後我自己申請調部門後,連續返咗8日0730~2300,Pick Up吓而家個位既工作,到尋晚終於比自己放6點,個腦就開始亂諗嘢,情緒一波波咁湧出嚟,做埋Gym返到勁細既屋企,都係空虛異常.

BB豬呢個時侯踢咗我1吓,2吓,3吓,好奇妙,心情好複雜,10秒前我唔開心咁喊緊,呢個Moment我喊住成面眼淚,抱住個肚又笑咗出嚟,過多10秒,諗起自己已經離開咗老公,唔可以拖住佢隻手㩒住我個肚,分享呢份喜悅,過多陣又諗緊可能BB豬比緊鼓勵我,再過多陣都係覺得有少少難過...

感恩踏入到22週,嚟緊開始要搵Agent幫手搵姐姐,同埋要約幾個陪月姨姨,睇睇大家啱唔啱或者夾唔夾,另外亦要搵家務助理,喺姐姐嚟之前幫手清潔家居.好嗰方面咁諗,而家1個人住,照顧少一個人,就算仲同佢一齊住,佢晚晚都係「話」要夜收工,唔會有時間幫我手.
6

感動流淚
1

清新流暢

到此一遊


豈有此理

剛表態過的朋友 (7 人)

發表評論 評論 (2 個評論)

回覆 Marshmallow_ho 17-3-28 12:01
體能許可,假日去郊區行下,對多d大自然,對妳及BB都有好處:—)加油!
回覆 sukimama.hk 17-3-28 12:19
都想試下行上寶馬山...

facelist

你需要登錄後才可以評論 登錄 | 註冊