×

用戶登入

找回密碼 | 註冊

20oC.80%
 

22Week6單親媽媽樹窿週記

熱度 3已有 318 次閱讀 17-3-29 15:05

「其實你可唔可以詳細解釋吓,BB出世紙落爹地名,將來會有咩影響?」我覺得自己既語氣,好似問緊個寶馬啲Sales,點用個i-Drive系統咁,經歷過呢一切後,離婚對我,遲啲可能駕輕就熟.

眼前呢個律師,係師爺朋友介紹,第1次電話傾既時候,我以為佢爭師爺幾球,之前同老公用緊嗰個律師,或者我公司班律師,問親佢地嘢,答案多數係1個字起,2個字止,最多最多係5個字,例如:「Check Check再覆你.」反而呢個律師,答到好詳細,同埋最後仲會講多2句嘢,安慰鼓勵吓.

上星期請呢位律師,比份分居協議書,比我以前用開嗰個律師,即係以前同老公幫襯嗰個,亦都順便請佢地將幫緊我手處理既工作,同我而家呢個律師做交收,我同律師既諗法係,先比份協議書對方,如果對方強硬態度,我地就做返份分居証明比對方就算,始終我搬走既時候,只係留咗個Whatsapp比老公,亦冇清楚講我要分居,或者離婚...

我記得我老公追我嗰時,有次睇睇吓戲,拖住我就當追到我,之後嗰3個月,我成日爹佢:你都冇「正式」話要追我,冇「正式」問我可唔可以同你拍拖,你只係拖咗我隻手,而我只係比你拖...結果我老公就咁拖吓拖吓,3年後就拖咗我上紅地毯.

又3年後,到我走嗰日,輪到我冇勇氣,面對住佢,同佢講聲:「不如分手啦...」人大咗,更加覺得,心照算罷啦,或者搵個第3者,幫手傳遞訊息,簡單方便,唔駛煩...搵個第3者,其實真係都幾簡單方便,唔駛煩,後者我講緊我老公出面收埋嗰種,有錢,租個單位,簡單方便,唔駛煩.

結婚,好煩,曾經我地為結婚既安排,都煩咗成年,淨係排邊個親戚朋友同事坐咩位,都搞成個月,拍3年拖,有1/3時間係為搞結婚既嘢,諗返起,好蠢...不過凡係做蠢嘢,先開心既,我成日做蠢樣氹我老公開心;佢亦都會做好多蠢事比驚喜我.婚後呢3年,我唔會否認,真係好開心,睇住佢好比心機工作,晚晚OT(即係我以為...),27歲仔好勤力係咁考唔同既牌,可以賣既產品越嚟越多,亦都叫升過吓職,睇住自己仰慕既男人,為自己既事業打併,作為個女人仔,其實仲想點,只係做到唔好煩佢唔好問佢公司嘢,有時間就整大餐比佢,幫佢處理家頭細務(或者搵家務助理幫手),同埋盡量用盡女人可以用既方法氹心愛既男人開心,同埋減壓.....係,據我所知,佢工作壓力大,咁佢成日就會話出去車會活動減壓(即係又係我以為...)

佢忙,我亦樂得清閒,反正唔駛放工趕住走,放工又可以約朋友食飯,一係就做Gym跑步游水,又或者返屋企陪爹地媽咪食飯,星期六日,我地又會陪老爺奶奶,或者去探我2個家姐啲小朋友,然後好正常咁經過幾個寒暑後,上年11月,經過3幾個月努力後有收成...

我記得...我掉支Bingo咗既驗孕棒比佢睇,佢都好開心...
我記得...佢話過會抽多啲時間陪我...同BB
我記得...佢好開心,聽到我話會用盡其他方法幫佢發洩,(有啲嘢佢想好耐我之前唔制,有BB之後我諗諗吓都係比佢啦)...我都唔想佢忍足年幾(即係再次又係我以為...)
我記得...第1次聽到跑馬仔既心跳聲,大家拖實隻手,大家雙眼通紅眼濕濕好感動...
我記得...第1次睇超聲波,老公唔知應該掛住望Mon定係望住我笑好...

但我而家,我唔想記得,但...成腦都係張車Cam卡,佢地既對話,佢地冇熄車,然後錄低車震既聲音(即使影住車外面,但基本上都好似望到一樣),晚晚老公都係車咗佢返隔離2條街佢地間屋,先再返我地屋企既畫面,一幕又一幕,一訓覺就浮曬啲聲音同話面仲有對話,去過邊...

結婚,好煩;有BB後搞離婚,都唔係唔煩,至少我呢個星期真係一頭煙...
星期4:叫律師出信
星期5:上外傭公司睇姐姐CV
星期6:收返老公律師信,話佢承認自己係呢段婚姻做錯嗰位,佢願意接受我提出既選擇,分居或離婚...嗰日我喊到痴咗線...有呢度識既JM或入既Group開解,不過都係喊到痴咗,停唔到,我唔知係老公認錯,而我釋懷?定係佢冇1個選項比我,叫我返去?咁就6年既感情,3年既婚姻?唔捨得?唔忿氣?嬲?怪自己冇眼光?太信佢?定係死蠢...死蠢...死蠢...死蠢...死蠢...死蠢...應該係死蠢,唔係蠢,係死蠢,蠢到死,我係完全睇唔出,我肯定佢地喺埋一齊唔止1年...呢1年佢地做果咩呢?之前出Trip又有幾多次係真呢?

做蠢嘢,會搞到自己好開心;自己死蠢,我而家好唔開心,但我又唔可以太唔開心,我驚影響BB豬,我而家個情緒,好似波浪咁,係咁上上落落,星期6喊完鋪勁既,下晝出去跑步,夜晚同陪月公司簽陪月姐姐...
星期日:上外傭公司比錢簽約,Full Payment,但簽約原來唔代表一定嚟到,同埋最快要3個半月,即係7月幾先到.返到屋企打扮吓照吓鏡,個人又開心返少少
星期1:家務助理等我放工後,約返比鎖匙佢,之後逢星期2,4幫手4個鐘
星期2:Lunch Time見律師,最後決定:
- 我要求離婚;
- BB落名果Part唔會主動同對方協議,等佢地問先再覆;
- 按市價放售一齊供緊既物業,平分相關開支後剩餘既金額;
- 要求對方提交資產列表 或 提出可行既瞻養方案....
暫時係咁....

就係咁,星期2既Lunch就喺律師樓坐咗個幾鐘.

放工後約咗車行收我部車,係我畢業後送比自己既禮物,初時以為會陪到我老,以為會車住我BB週圍去睇吓呢個香港,BB凳都買埋....佢為呢段失敗既婚姻,成為首個犧牲品,希望佢會搵到處好人家.

結婚,好煩;有BB後搞離婚,都唔係唔煩;點面對屋企人同朋友,我真係覺得好煩,我最好既Friend都係U或Hall或做莊識既,全部,都識我老公,雖然我知,佢地會企我呢邊,但真係唔想面對住,唔想見人,喺呢度或者自己個Blog或者個Page到打文,已經係我最好既方法去發洩,樹窿啊樹窿,今日講到呢度.
3

感動流淚

清新流暢

到此一遊


豈有此理

剛表態過的朋友 (3 人)

發表評論 評論 (1 個評論)

回覆 outmax 17-8-23 12:48
為了BB,要撐住

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved. 有關我們 | 使用條款 | 免責聲明 | 私穩政策 | 廣告查詢
1.香港服務名牌選舉 公民企業嘉許計劃 中小企組別金獎 2013香港資訊及通訊科技獎 匯豐營商新動力 2013 無煙領先企業金獎 家庭友善僱主 社會資本動力獎 商界展關懷 連續五年標誌 碳審計-綠色機構 有心企業 友商有良 全面關懷大獎 無障礙網頁 - 流動應用程式銀獎