今日午餐食咩好?若然你冇咩頭緒,可以參考近期BK廚房為你預備嘅健康新煮意!話說上次拉完筋,BK就吹起養生風潮,有幾個同事決定喺office整啲簡單又健康嘅午餐,小編當然都要八卦吓啦!
衛生署建議我哋「日日二加三」,即係每人每日要食最少兩份水果同三份蔬菜,所以同事準備咗唔同種類嘅沙律菜、蕃茄仔、牛油果同青椒等等。lunch前浸定啲食材就可以慳返好多時間喇~
淨食沙律怕唔夠飽?唔怕,仲有健康飽肚第二彈!就係雜錦藜麥飯喇~又係只需要lunch前浸定,再放入電飯煲就得!得咗!
大功告成喇!呢度大約係六個人嘅份量~配埋特級初榨橄欖油就可以開餐喇!依照健康飲食金字塔,除咗穀物類同蔬果,我哋仲需要食適量嘅肉同蛋,一人一雞蛋,再加多味醬燒金沙骨,perfect池!
呢幾星期,pantry總係傳出陣陣香味同笑聲,搞到大家好心動,紛紛話要加入bk廚房!聽聞同同事喺公司一齊煮食有助增加士氣,大家都不妨同同事試吓啦!