「嘔奶」，相信好多新手爸爸媽媽都遇過，我亦都唔例外。依稀記得小JM第一次嘔奶嗰陣，我真係俾小JM嚇咗一大跳，可能係因為「第一次」面對呢種突發情況，所以真係有啲不知所措，又緊張又擔心。
再加上被長輩們嘅緊張氣氛包圍之下，對於人奶媽媽嘅我而言，當下真係有種莫名嘅壓力，所以當長輩們離開房間之後都忍唔住抱住小JM喊咗一陣。相信有唔少新手媽媽們都會面對過同樣事情，亦明白箇中感受。
原來嘔奶現象係最常發生係初生小B們身上，而健康院姑娘都有教媽媽們點樣掃風同處理嘔奶問題，媽媽們有唔明就請教姑娘了解一下，咁就自然容易處理好多架啦。
嘔奶嘅成因
其實係因為小B們嘅食道同胃之間嘅「幽門」仲未發育成熟而引致。小B們食完奶之後，幽門因為會暫時未能夠緊密地關閉，所以每當小B們飲得太飽、太快、四圍郁或仰睡嘅時候，奶就會好容易由胃倒流出來，就會產生「嘔奶」嘅情況。但當小B們慢慢長大之後，呢個情況亦會慢慢得到改善，所以爸爸媽媽們唔駛要太過於擔心同憂慮嘅。
嘔完奶係咪會餓架？
長輩們每每聽到小B嘔奶就會擔心小B嘔完奶會肚餓，會想再次餵小B飲奶，但其實係唔需要嘅。
其實姑娘都有解釋過小B嘔奶只不過係飲奶飲得太飽或太快，而引致小B將多餘嘅空氣吸咗入個胃仔度，所以先會有嘔奶嘅反應，而唔係因為小B們病咗或者有咩唔舒服嘅。因此都唔需要急於再餵小B們飲奶，否則就會有機會造成「過度餵食」（Over feed），攪到小B飽得滯，肚仔就會好辛苦架啦。再者，小B頭幾個月嘅營養未算太多，所以嘔少少奶其都唔會對健康有太大影響嘅。
點樣減少嘔奶嘅機會？
1. 需要檢查奶咀嘅出口孔大小適中，以確保小B飲奶個陣唔會有太多空氣係奶咀，減低小B吸入空氣嘅機會。
2. 盡量唔好等到小B太餓先至餵，因為當小B太快吸啜都有機會吸入空氣架。
3. 如果小B真係唔願意進食嘅話，唔好強逼進食，以免造成過度餵食。
4. 可以將一餐奶分開兩部份進前，食完一半後，可以先拍嗝，再餵，待完成再拍嗝。
5. 如果發現小B肚脹脹嘅話，可以用「搓暖」雙手再幫小B按摩肚仔，以紓緩肚仔內空氣積聚嘅情況。
6. 小B食奶後若拍嗝未能夠吐氣嘅話，可以用毛巾或三角枕墊高小B背部， 變成稍稍側卧嘅睡姿，有助減少嘔奶之餘亦可減低因仰睡嘔奶而造成嘅窒息風險。
如果對小B嘔奶或嘔吐情況有擔心嘅話就可以帶小B見醫生。另外，因為小B嘔奶時會有機會令嘔吐物流入氣管，如果小B們嘔奶後持續咳或呼吸急促，甚至皮膚、嘴唇變藍嘅話，就要立即到急症室救醫。
點樣為小B拍嗝？
長輩們曾經分享經驗提到有三種方法可以為小B們拍嗝，分別有：
1. 讓小B坐起托腮拍嗝
2. 抱直小B趴係肩膀上拍嗝
3. 小B趴轉訓係大腿上拍嗝
而我只係用過其中兩個方法，就係小B坐起托腮拍嗝同抱直小B趴係肩膀上拍嗝。兩個方法都好用，但最方便、安全就緊係前者啦，因為媽媽可以唔駛企起身，而且可以清楚見到小B有無嘔奶。（唔駛整到媽媽一身都係）
小分享：
1. 讓小B坐起托腮拍嗝法
．先安置好小B係大腿，頭仔要向前（即小B面向媽媽嘅左或右方）
．以紗巾墊住小B領口位，以防拍嗝時嘔奶
．用手輕扶小B下巴及肩膀位置，以固定頭部
．用另一隻手由下而上幫小B拍嗝，而手掌形狀需要呈拱形，慢慢輕拍背部
（附小JM拍嗝醜態）
（以下非正確姿勢，因為小JM已醉倒，側左個頭埋一邊。真係失禮）
2. 抱直小B趴係肩膀上拍嗝
．先將紗布巾放係媽媽嘅肩膀上
．扶穩小B頭及頸，將小B下巴靠係已墊著紗布巾嘅肩膀上
．媽媽可以一隻手扶住小B Pat Pat
．以另一隻手由下而上幫小B拍嗝（手掌需要呈拱形）慢慢輕拍小B背部
當聽到小B發出 「嗝聲」之後，可以再抱多小B 十五至二十分鐘，以確保小B 呼吸無問題及無再嘔奶後，就可以將小B放返去床仔架啦。
