2021-03-14

3K

港媽堅持零電子奶咀7年︰「最難係自己冇得玩!」

好多朋友都覺得我屋企好「變態」,就係無畀電子奶咀小朋友嘅習慣。小周董已7歲,除咗依家要上Zoom堂同做功課,其它時間佢都無用電話或玩iPad。好多朋友問我究竟點做到?究竟呢個年代,唔畀玩小朋友電子產品,佢哋會變成點?無電子奶咀有咩好處同壞處?以下係我7年來嘅親身經歷。

第一步︰堅持!亦都係最重要一步。我同老公由決定生小朋友前,已有共同理念係培養小朋友閱讀習慣,所以睇得多電視、iPad同電話,畫面太豐富,有比較下本書仲點會吸引?所以大小周董2歲前我哋屋企係完全無開過部電視,直至3歲後每天才有半小時TV Time,每天堅持有Story Time,除咗令佢哋唔怕拎起本書,亦有效提升親子關係。

出街堅持一定要帶住2本書、幾張白紙同幾枝筆。不論出街食飯等食中可以看書,坐車亦可以用紙筆玩小遊戲,雖然拎部電話畀佢哋,成餐飯真係會容易好多。但因為我係Working Mum(在職媽媽),我會當呢個都係我同小朋友的小小親子時間。只要父母肯同佢哋一齊睇一齊玩,要相信小朋友一定係鍾意爸媽多過部電話。

第二步要同小朋友參與多啲唔同活動。無電子產品嘅小朋友一定會較悶,所以同佢哋可以出去玩多啲或者做運動,發洩下多餘精力。另外平時如果坐長途車,腦入面要諗定一啲用口或眼可以玩嘅小遊戲,例如簡單中文字接龍、鬥講不同顏色或形狀東西、鬥快搵到10架黑色車等等。家長要有耐性同認真玩,就算一小時車程時間都可以過得好快!

第三步係父母要做好榜樣,想小朋友唔玩電子產品,自己首先要先戒掉。當然我明白係好難,我意思係喺小朋友面前戒掉。我都唔記得自己幾多年無睇過電視劇集,有時有啲節目好想睇,我同爸爸都會等小朋友瞓晒,10pm後才開場。另外,大小周董係男仔,特別鍾意模仿爸爸,所以爸爸的堅持同陪伴係十分重要。本身爸爸鍾意睇書同做打網球,大小周董亦都有受到感染。有樣學樣係真的! 所以身教真係好重要。

其實好多人話好難唔畀電子奶咀小朋友,我原本覺得,唔好畀佢開始就唔需要去戒。可惜今時今日小朋友一定要透過電腦返學做功課,逃唔過一定要使用電子產品,但亦都係因為每天已經有幾個鐘走唔甩,所以其它時間更加需要控制小朋友使用時間。

其實回想早20年前完全無電子產品,我哋都係一樣開心成長,所以父母嘅堅持真係好重要,唔好小朋友喊幾句或者發下脾氣就可以得到手機或iPad,說好半小時就半小時,準時熄機,如果佢喊或者發脾氣我會唔理佢,甚至罰佢明天由半小時減至15分鐘,等小朋友知道喊或者扭計係無用,其實少啲電子產品,屋企人會多咗真正相處、真正坐低傾偈,關係點都會Close啲開心啲!呢樣肯定係真嘅,所以大家一定一定一定要堅持啊! (重要的事要講3次)

下一篇我會同大家分享大小周董這些年來無電子產品係玩啲咩!

【編按:以上內容為作者之個人意見及立場】

相關文章

【電子奶嘴】1歲幼童常看電子屏幕 3歲患自閉症風險恐增加 專家:避免睡前看

親子閱讀無從入手?專家提供小貼士 把握0至6歲黃金學習期

【教育方程式】爸爸陪讀比媽媽效果好3倍!拆解3大好處

為讓孫女乖乖坐定 嫲嫲容許3歲女每日玩手機致姆指發炎要做手術

緊貼新冠肺炎最新相關資訊