2019-06-12

16.9K

【包媽孕記】孕期最後一個關卡: QE做B鏈檢驗

整個懷孕期間媽媽面對好多個挑戰,照閃閃、NIFTY/T21、結構、糖水期,去到孕期最後階段準備打大佬前最後一關,就係驗B鏈啦﹗35W2D,包媽被安排返到QE產檢加驗B鏈

到底咩係B鏈呢?來自衛生署網頁嘅資料:全名叫乙型鏈球菌。係一種常見寄存在人類腸道、泌尿和生殖系統嘅細菌。約10-30%懷孕婦女陰道或直腸拭子樣本中可以搵到呢種細菌。中咗B鏈嘅孕婦,一般無任何病徵,但生產時有機會傳染俾BB。乙型鏈球菌是最常見引致新生兒嚴重早期感染嘅病菌,有機會令呼吸道出現問題,心率和血壓不穩定,腸道和腎臟出現問題,亦有機會引致肺部感染,血液感染和腦膜炎。

一瞓低姑娘就溫馨提示:「唔使用鴨嘴鉗㗎唔使緊張﹗」姑娘真係好溫柔好熟練,用棉花捧喺陰道及肛門位置取分泌物,兩個地方加埋用咗唔使三秒就完成,只係有少少緊張但無痛亦無不適感覺,報告會喺下次產檢時通知。另外俾咗份小冊子B媽返去參考。

如果真係不幸驗到有B鏈,媽媽們都唔使太擔心,根據醫院俾嘅小冊子,會喺分娩時打抗生素,BB出世後檢驗觀察情況即可。夠35周後公立醫院就會為孕婦提供B鏈檢驗,喺陰道及肛門位置,用棉花捧取分泌物。如果到私家醫院開刀又怕拎唔切報告,都可以去私家自費檢查。

【編按:以上內容為作者之個人意見及立場】

相關文章

孕中後期有煩惱?!

孕婦的飲食日常:她們與「熱氣」食物的矛盾

【預防勝於治療】懷孕媽媽之我要對抗鼻敏感

神奇的時刻:孕媽媽及新手媽媽Apps推介