「你咁瘦,BB健唔健康架?」懷孕期最憎聽到呢啲說話!

2019-08-08 1,189


幾時都話媽媽真係好偉大,十月懷胎要經歷孕吐、腰痛、頭痛、腸胃不適等症狀,而且成個身形同生理系統都會有好大嘅變化,簡直面目全非,仲未計因為佗B而要喺工作上有所調整或者犠牲……而最攞命嘅係,當你已經面對緊好多嘢,但身邊啲親戚朋友姨媽姑姐三姑六婆總係會口不擇言,講啲說話嚟踩中你地雷,有時聽得多真係想開口鬧佢哋!

有媽媽就喺討論區分享咗佢哋懷孕期間聽到覺得好厭惡嘅說話,其中呢三句係一聽立即火滾!

 

1. 「你咁瘦,BB健唔健康架?」

唔通天生瘦底都有錯?佗B真係愈肥就愈好咩?唔少媽媽都話自己本身瘦底,所以即使個BB就嚟出世,個肚依係好細,手手腳腳亦都冇特別變粗,但BB嘅體重係絕對正常!但偏偏有啲姨媽姑姐一見到廋底嘅孕媽媽就會話:「嘩,你咁瘦嘅!要食多啲嘢呀!唔係會餓親阿B架!」、「食多啲嘢呀!你咁廋,因住阿B唔夠營養呀!」真係聽到反晒白眼,令媽媽們好想吶喊平反:「我BB不知幾健康呀!」其實最着緊BB嘅一定係媽咪,旁觀者不得𪘲牙聳䚗!

 

2. 「冇經歷過陣痛唔算係真正嘅媽咪!」

決定順產生定開刀生,係好多媽媽都要掙扎一輪先做到嘅決定,生嘅BB呼吸道發展會好啲,但媽媽除咗要承受陣痛同生產痛,亦有機會出現各種產後併發症,又或者有其他受感染嘅風險。所以無論順產定開刀,對媽媽同BB都各有利弊,老實說只係一個選擇,並無分對錯,每個媽媽都有權利選擇自己生產嘅方法。

不過,有啲人硬係覺得順產生先係王道,甚至會睇唔起開刀嘅媽媽。討論區上就有選擇咗開刀嘅媽媽表示,曾經聽過好難聽嘅說話:「你揀開刀呀?係咪怕痛?咁唔捱得嘅……」嗰位媽媽心諗:係咪痴線架,開刀唔痛架!?

其實明明開刀後麻醉藥過咗一樣要痛到要死,術後等傷口復原嘅過程仲分分鐘耐過順產生,啲人憑咩否定選擇開刀生嘅媽媽嘅努力?

3. 「吓食奶粉?為BB好,堅持吓為人奶啦!」

人奶天然又有營養,有條件的話梗係想餵啦,但唔係個個媽媽都有足夠嘅奶量畀BB架嘛!但啲三姑六婆一聽到你話沖奶粉,硬係好鍾意唔理好醜乜都批評咗先:「吓你冇餵人奶喇?點解唔堅持吓呀?為BB好架話一定要餵人奶架!」救命!有時飲極上奶湯水都係冇奶水,咁都冇計架!

唉,Juicy媽成日都覺得,冇親身試過架話真係唔係亂咁批評人哋。明明有啲三姑六婆自己都經歷過十月懷胎嘅辛酸啦,當事人嘅情況一定係當事人先最清楚,點解要評論人哋嘅做法呢?相信各位媽媽懷孕期間都聽過唔少難聽過粗口嘅說話,Click入去一齊交流吓啦!