【湊個「好」字真係好?】三胎都係仔,苦惱唔苦惱?

作者:茄莉姨姨

2019-04-02 10,134


唔知各位媽媽仲記唔記得,第一次醫生透過個螢幕話你知BB性別嘅時候係咩反應呢?如願以償,或是患得患失?雖則話BB係男仔定女仔都係一種緣份,就算比你機關算盡都總有意外,但做人嘅嘢,有時都可以有幻想空間嘅!

咁講到生兒育女,到底以咩性別組合係最好呢?最近就有位懷緊第三胎嘅JM分享,已經有2個囝囝嘅佢,非常擔心第三胎都係仔,先唔好講話要湊個「好」字定「嬲」字,單單以男仔嘅活動能力同頑皮度去計算,真係擔心到時屋企都被反轉,有其他JM都話:「3個仔,屋都拆埋你」、「真係會有失落感」、「我覺得兩姊妹係最好」…

曾經就有調查顯示,家庭組合以兩姊妹幸福指數最高,除咗可以一齊扮靚、傾心事之外,女仔一般嚟講都比男仔細心,相同地會較為體貼父母,將來嫁咗出去,心依然會記掛娘家。至於有唔少媽媽至愛嘅兄妹組合,就排行第二,無論年紀差距大定小,作為哥哥都會不其然展現出保護妹妹嘅男子氣慨,即使年紀相若可能會出現爭玩具情況,但隨住成長哥哥還是妹妹嘅最強悍衛者。

順帶一提,大家唔好以為仔仔愈多,煩惱指數愈高,根據調查結果所指,令人最崩潰嘅就要數到4公主組合,女女們瘋癲起上嚟,麻煩指數絕對係以幾何級數跳升,效果遠遠超出你想像,有時撒嬌喺上嚟,真係好似睇緊宮廷劇一樣;點都好,作為父母,最想都係小朋友健康快樂地成長!

即刻上討論區一齊傾

【編按:以上內容為作者之個人意見及立場】