2020-01-17

1.7K

認錯

尋日陪你做功課嘅時候,
我因為自己心情狀態好差,
冇控制好,發咗你脾氣。

係呀,我又做得唔好。。

但係冇幾耐你又好似冇事發生過咁,
依舊好好唱口又同我玩又古靈精怪。

到沖涼之前我抱住你傾計。

我:爸爸想同你講對唔住。
你:?
我:頭先做功課嗰陣爸爸好惡話你係咪?
你:(點頭)

我:
發咗你脾氣係我唔啱,
爸爸因為xxxxx所以好唔開心,
但係我冇控制好發咗你脾氣,
你可唔可以原諒我?

你:(面上帶住非常滿足嘅笑容)可以!
(你攬實我,一隻手喺我背脊慢慢拍)

嗰一刻你嘅動作令我覺得好窩心好震撼,
我真係好被你安慰到,
唔單止係我發咗你脾氣呢件事,
連本身困擾緊我嘅事都好似得到舒緩咁。

然後我地好開心咁一齊沖涼刷牙瞓覺。


我相信與其教你點樣可以成功,
其實要先教你點樣好好面對失敗。

哈,雖然我想教你,
但係其實我自己都未做到。
我仍然太介意自己失敗。

你教識咗我,做得好唔好雖然係重要,
但係無論如何人總會有做得唔好嘅時候。
更重要嘅,係我同你嘅關係,
係愛,而唔係對錯。

遇,多謝你:)

【編按:以上內容為作者之個人意見及立場】

相關文章

【開學優惠】多個興趣班限時優惠 學術、跳舞、彈琴、記憶班應有盡有

【親子急急問】開學後小朋友感焦慮低落情緒 不願回校?家長必學四步曲!

語言發展遲緩女兒與老師聊天卻遭取笑 媽媽嬲爆:應否投訴?

【幼稚園入學】2023至2024學年 全港各區熱門名幼申請懶人包

緊貼新冠肺炎最新相關資訊