2018-10-30

6.8K

理財專家不會教你-了解自己窮的屬性

2003年,黃子華係佢既《黃子華棟篤笑:冇炭用》入面講到:「你地一定要讀多D書呀,如果唔係你地係唔會明白點解你地會冇野做﹗」

大家覺得好笑之餘,其實子華神講既野往往都有大道理係度。同樣,十幾年後既今日,香港人同樣已經走出左沙士同一次又一次既金融危機。但係我地既生活好似真係冇乜好左!睇下面書上既新聞,好多人一樣係好窮,搵到錢都會窮,點解呀?洗哂囉!搵得多洗得仲多咪會窮囉!唔係咁樣?就要細味下子華神呢句說話,當你想改變現狀,第一步就係要知道自己點解會好似而家咁窮。

窮生點解咁鍾意講D唔開心野?因為幸福就得一種境界,潦倒卻係每一種潦倒既情況都有佢自己既故事,有趣好多!同樣,窮係潦倒既一種。所以窮都有分幾個屬性,好似睇中醫咁,你了解左自己係咩底既人,之可以對正下藥去醫,就等窮生幫你把把脈。

__________________________________________________

消費系

香港最常見,同中醫學上既濕熱人士一樣咁多。點解咁講?因為香港係亞熱帶海洋性氣候,溫度高,濕度都高!加上香港人飲食同作息習慣。所以香港人大多都有濕熱問題。同理,消費型貧窮同樣係受香港環境影響而生。香港係資本主義社會,消費主導。大家習慣左以錢去解決生活上既問題。餓?外賣囉!朋友見面,一定係宵夜直落啦!D野壞左咪換過新囉….要洗起上黎,以一個月二萬左右既一般打工仔黎講,係咪真係咁足夠俾你去用錢解決問題呢?

治療方法:美沙酮療法

所謂消費型既人其實係上左癮!癮君子大多係意志力薄弱人士,治療應該低淺入深,了解自己一個月既行為模式以及消費習慣再去由你最冇癮果樣野開始減,例如比起食好野,我更加可以忍得到唔飛的。咁我地就減左飛的先。

錢方面我地可以先定下自己一個月既開支預算,先定一個儲錢計劃,例如月入15K,我一開始要定下月儲5K既目標。交3K家用,有7K可以用既。出糧先交家用,之後把5K轉到另一個戶口,將果個SAVING戶口既卡剪左佢。或作月供盈富基金投資等等。總之唔可以咁易用到!以5K既目標要年年增加,做到個人消費大約開支佔你收入25%以下為健康。

__________________________________________________

家貧系

呢類係香港都多,2016年統計署報告都話,香港有接近100萬貧窮人口,可見低收入家庭係唔少。作為低收入家庭既下一代,見住人地有DADDY俾埋首期,一畢業就開始供樓。而你一出黎12K一個月,仲比阿媽迫你一個月交5K家用先夠開飯。內心果種無奈窮生係好明白,因為窮生係家貧型貧窮底。

治療方法:化療

呢個情況係最難搞,因為呢個型係唯一牽涉到其他人既情況。你一定要同家人一齊定下共識。必要時你仲要把持左屋企既財政。因為呢個型係由上一代是旦一部分既家人係消費型/窮忙型而衍生出黎。你一定要係一個精明而量入為出既人先,以化療比喻因為當中你一定同家人會意見不合而磨擦。係有傷害性,甚至極端情況係會家變的。不過如果你唔解決,只會誇代貧窮下去。要改變一定要硬起心腸!計一計家庭基本生活開支,比一個緊緊夠用既家用金額。為屋企同自己日後都累積到財富先得!

__________________________________________________

窮忙系

呢種朋友多數係低學歷人士,有部分更可能係人生冇乜目標,唔擅長計劃既一群。低學歷低技術自然難以叫價。女生多見於文員,月入低於1萬。男生可能係做倉,食肆,超市之後地方,月入可以萬幾,但最慘好快見頂,頂薪做到老也可能只有2萬多元。而且呢類工大多工長好長,又困身。好快,你既圈子就得返同事,眼光也只有舖頭以內,沒有時間同心力累積財富,就算累積到可以2—30萬你都冇知識去好好利用呢筆錢。

治療方法:物理治療

叫物理治療係因為,低學歷人士長時間冇吸引新知識,大腦同身體都對新事物開始有麻痺感覺。要透過進修/轉行,一步一步由困身而低收入的困境走出來。慢慢恢復同外界既聯繫,同吸引新知識,新技術既習慣。例如你可以報讀語文或專業技能相關課程,考取有關資格。由日日12小時的手動工作,慢慢多用腦去work smart。回復生命既靈活性!

【編按:以上內容為作者之個人意見及立場】

相關文章

緊貼新冠肺炎最新相關資訊