2020-11-30

2K

【幾個移民媽】美國「天才班」老師大讚串錯字:最怕學生不敢犯錯

「愉快學習」,開開心心就學到嘢,邊個唔想。於是,happy school成行成市,間間學校都話,要喺遊戲之中學習。冇錯嘅。只不過如果都將佢等同「遊戲學習」,咁就忽略咗精髓:愉快,即開心嘅感覺。有得玩,梗係好啦,但唔一定開心。玩完之後,即刻默書小測,攞低分就俾老師訓話。你話玩得盡興,定玩得心驚膽戰?所以「愉快學習」除咗重視「玩」,仲體現喺老師對學生嘅「讚賞同鼓勵」。

更多文章:【幾個移民媽】未能移民前 在港亦盡量感受外國生活

串錯字都值得讚

有一次我去接囡囡放學,老師話有個驚喜要話我知。佢遞俾我一幅囡囡嘅畫。佢畫咗三個人仔,中間嗰個嘅上面,寫咗4個英文字母:M、I、D、O。老師大贊囡囡,竟然識將middle串成mido。我一頭霧水,唔明白串錯字有乜好讚。點知老師話:呢個錯體mido唔嘢少,證明囡囡領悟到發音嘅規律。佢仲話:喺呢個階段,唔需要刻意糾正,等佢大個啲,睇嘅書多咗,自然識得串。

呢個錯體MIDO唔嘢少,證明囡囡領悟到發音嘅規律。

囡囡俾人讚,梗係開心啦。嗰次之後,佢嘅創作裡面,除咗有圖畫,仲多咗好多句子。其實依個就係分別。我細個嗰陣,學校真係好傳統,多數睇你錯喺邊,缺點係乜。寫錯字?返屋企改正十次。面對美國「天才班」嘅順其自然,我佩服得五體投地。老師鼓勵你去嘗試,唔使怕做錯,最怕你唔敢去犯錯。處於呢種「唔怕錯」嘅環境,細路會變得更加主動,更加鍾意學嘢,有一種相信自己嘅快樂。

「天才班」鼓勵學生嘗試,唔使怕做錯,最怕你唔敢去犯錯。

「愉快學習」除咗重視「玩」,仲體現喺老師對學生嘅「讚賞同鼓勵」。

因爲「唔怕錯」,囡囡嘅句子越來越多,越寫越開心。

更多文章:【幾個移民媽】飛英生活體驗日記 第三章:離開家園的傷感

親子關係值千金

你班大人成日話:轉數快,好世界。你逼個細路記生字,背乘數表,佢個腦只會越背越實。就好似我細個想留長頭髮,阿媽嫌難打理,就同我講:「等陣去飛發鋪,叫師傅剪到啲頭髮好長好長,到時你就可以玩花式鬢辮啦。」我每次剪完髮都好失望,因爲啲頭髮冇變長,反而仲短咗。阿媽就安慰我:「下次我哋再搵個手勢好嘅師傅啦。」之所以講呢段傷心史,係想你諗吓,自己有冇做緊同樣荒誕嘅事?相悖嘅方法,只會南轅北轍,離目的地越行越遠。機械重複嘅訓練,只會令思維固化,絕非更加敏銳。日日搞到家嘈屋闭,犧牲咗親子關係,仲講乜「愉快學習」吖。

更多文章:【幾個移民媽】移民不只為子女 大人其實都可以找自己

父母嘅眼界同心態,決定阿仔阿女嘅境界。

呢個社會你追我趕,好多父母都好焦慮,怕小朋友學得唔夠:乘數表背得唔夠熟,唐詩三百首淨係記得兩百首,唔記得莎士比亞嘅哈姆雷特講過啲乜,令仔女輸喺起跑線。其實,真正嘅起跑線係乜?就係你!父母嘅眼界同心態,決定阿仔阿女嘅境界。

【編按:以上內容為作者之個人意見及立場】

相關文章

【幾個移民媽】以仔女為移民核心險成噩夢 港媽:移民唔應該只為仔女

【幾個移民媽】美國學校假期0功課 仲送埋玩具board game

【幾個移民媽】飛英生活保暖靠秘笈:「呢度嘅凍真係唔講得笑!」

【幾個移民媽】人約離鄉前 把握機會欣賞香港的風景

緊貼新冠肺炎最新相關資訊