2019-11-09

1.8K

【理智與感情的角力賽】第三者的懺悔:應該落地獄!

歌仔都有得唱《相愛很難》,其實兩個人要經營一段感情真係唔容易,升級去到婚姻呢個階段就有更多嘢需要顧及,稍稍嘅唔同步,可能足以造成婚姻嘅缺口,令雙方關係出現變化!喺討論區真係周不時都會見到有JM傾訴婚姻被第三者介入嘅經歷,好彩嘅就能夠抽身離開,或者等到浪子回頭,唔好彩就一拖再拖,拖到心力交瘁都搵唔到出口。

每次睇到激氣又心悒嘅時候,Juicy媽都好想訪問下啲第三者,到底係咪爭返嚟特別香?唔通無聽過「他朝君體也相同」呢句說話咩?唔好話出軌嗰個係男定女呀,聽聞呢啲嘢真係出開有條癮,他日當你變成正印嗰陣又要擔心返第三者來襲,咁又有乜謂呢?

討論區熱話從正常人變成一個無恥既第三者

最近就有位仁兄喺討論區親述一段「第三者的懺悔」,對於自己曾經介入人哋婚姻嘅決定,非常咁後悔,形容自己已經跌入萬劫不復之地,唔單止無為女方改善到原本惡劣嘅生活處境,仲可能令情況更差,雖然已經斬纜,但可惜已經恨錯難返。

對於呢個個案,JM們嘅睇法都有啲唔同,有JM覺得樓主講咁多,其實通通都係借口,有人就認為至少樓主最後都選擇抽身?以Juicy媽去睇,樓主似乎都係迫於無奈先選擇分開,如果女方肯離開原本嘅家庭,又可能係另一個大團圓結局,老老實實,確實睇唔到有幾悔恨自己做過嘅事。

而文中提到,出軌嘅一方長期受到家暴,亦因為咁令樓主釋出憐愛之心,繼而互生情愫,有JM就指出如果遇到家暴可以向社工求助:「以家暴、虐待、違反人權案件處理,法庭出禁制令。」,Juicy媽就係話遇到家暴唔慘,之不過因為家暴,所以出軌,好似唔係解決問題嘅方法喎!

討論區熱話從正常人變成一個無恥既第三者

其實講到出軌同第三者嘅問題,Juicy媽從來都覺得係一個理智與感情嘅問題;情感嘅嘢,有時候確實唔係你話控制就控制,之但係行為同決定呢?你係絕對可以用個腦去操控;簡單啲咁講,控制唔到個心有幾鍾意,但都控制到個口講唔講比人知你好鍾意啩!

人類之所以係萬物之靈,係因為佢哋擁有嘅智慧同思想比一般動物高,唔係下下話愛就去做,識得思前想後,亦應該有能力承擔後果;雖則話每個愛情故事嘅結構同背景都唔同,而婚外情亦唔例外,但講到尾有啲嘢係咪都要啱程序呢?當時、地、人都錯嘅時候,你幻想可以拯救宇宙,但似乎宇宙根本唔需要你拯救,咁又係咩一回事?

【編按:以上內容為作者之個人意見及立場】

相關文章

離婚需要雙方同意?

何必惡鬥小三!揀個「錫自己」嘅生活方式吧