2019-06-10

8.3K

【自私精老公】解構嫁咗仲差過做女原因!

好多時聽啲女人呻自己老公係自私精,事事計較令老婆受盡委屈。真係睇到都覺得該煨囉,因乜事嫁咗仲差過做女時架。咁梗係唔係話嫁咗一定做少奶奶,但至少唔好畀人撳住嚟恰囉。

其實被老公食住好可能唔係一朝一夕形成。講真,隻佬一開始就咁差嘅,妳都唔會同佢結婚喇。好多女人都覺自己珍惜段感情,就事事忍讓。男人同佢計較,佢忍;男人點佢做嘢,佢忍;到男人唔尊重自己,佢都仲忍緊。嘩,點搞呀,自己都唔愛自己,人哋梗係打蛇隨棍上啦!

當然,呢個世界仲有好多好男人、好老公嘅。但Juicy媽就覺得自私精有時係被縱出嚟,未娶老婆時被阿媽當王子養、結咗婚又做大帝嗰啲呢!

唔好以為默默耕耘,為個家付出男人就會珍惜。如果妳對自己印象都係:師奶一個、肌膚暗淡無光、打扮老土乏味,咁唔該妳花啲時間執正返自己。妳可能會問:唔通我為個家捱生捱死,都仲要打扮到隻雀咁?非也,畀隻佬睇都係其次啫。最緊要自己感覺良好,咁人哋先意識到妳嘅價值。

結論:各位姊妹無論婚前婚後、生咗小朋友未,都記得要留返幾分去愛自己,唔好完全失去自己魅力,正如冇人會真心愛嗰隻種田嘅牛嘅啫!

如果問心自己已經做得足夠好,感情路不順純粹因遇到賤人。咁唔使怕離開喎,因為好嘅係後面等緊妳!

【編按:以上內容為作者之個人意見及立場】

相關文章

結婚前傾傾先,婚前輔導5要點締結和諧婚姻

老公唔做家務像大細路 竟成媽媽最大壓力來源?

老公與異性單獨去旅行 網民:當老婆是甚麼?

點樣應對「拖延症老公」?