2018-04-19

4.9K

管教小朋友時 最怕老公唱反調!

教細路同一齊玩係兩回事!玩嗰時永遠只會覺得佢可愛,但唔鬧縱壞咗喇,做阿媽嘅又會背負上管教不善嘅罪名,好難做架。

或者好多阿媽覺得只要教得小朋友好,自己做醜人唔係問題,但最怕身邊嗰個走嚟唱反調。大佬呀,教緊時唔幫口都算,一味喺度講阿媽好惡成日鬧人咁,想點啫。畀你湊分分鐘鬧得大聲過我呀!

呢兩日又畀我喺Forum見到有媽媽呻呀,老公成日喺自己教女時加把嘴阻止,火都嚟咁話喎!原來都有唔少媽媽有呢個諗法添。

試諗吓喺小朋友心目中,阿媽已經成日囉囉唆唆講「呢樣唔做得」、「嗰樣唔好掂」,已經唔太想就範。如果爸爸喺呢個時候再口多多加上一兩句「咁惡做咩啫」、「又唔係咩大事」或者「今次就算喇」咁嘅說話,你估小朋友下次仲會唔會聽阿媽支笛?

各位爸爸,一時口舌之快好容易,好心就珍惜吓身邊嗰個願意教仔嘅女人啦。仔女你都有份,唔好由得老婆一個潑婦罵街咁款先得架,自己都要幫手教架嘛。就好似有網民話教精咗老公,喺自己教小朋友時要講「快啲聽媽咪話啦」、「唔好激親媽咪呀」呢啲說話。爸爸媽媽同聲同氣小朋友先會快啲合作,唔係嘅話佢聽應該邊個講先?

就算真係管教上有咩意見,覺得老婆太惡,或者應該減少鬧嘅次數都好,都唔應該即刻喺小朋友面前講。得閒兩公婆先閂埋房門傾掂佢。有心教好個小朋友嘅話,兩夫婦同一陣線先係正道。

即刻Click入討論區一齊傾

【編按:以上內容為作者之個人意見及立場】

相關文章

緊貼新冠肺炎最新相關資訊