2019-11-02

1.7K

結婚前傾傾先,婚前輔導5要點締結和諧婚姻

結婚之後生唔生仔?生幾多個?財政獨立定係由其中一個集中管理錢財?結婚一生人一次,新人都忙住籌備Bid Day、影婚紗相、印喜帖等。除咗一切硬件上嘅準備,有冇諗過心理準備都好重要?婚前輔導可以幫助準新人更深入了解對方、調整雙方對婚姻嘅期望,喺結婚前疏理拍拖時嘅不快,有助婚後更和諧!討論區熱話講緊婚前共識但婚後轉軑嘅問題,甚至有男士結婚前本來共識唔生小朋友,點知點紀大咗就想要小朋友,仲係外面搵二奶生仔!一齊Click去討論區睇睇

婚前輔導有咩用?5大要點:

1. 調節雙方對婚姻嘅期望

拍拖時候情侶總係充滿浪漫,逢過時過節要畀對方驚喜,但結婚後日夜相對,要點樣維持呢啲浪漫激情先能令對方滿足?婚前去高級餐廳慶祝節日;婚後係咪繼續奢侈消費?婚前女方偶爾嘅任性、蠻不講理;男方嘅「大頭蝦」、「無手尾」,婚後需要每日面對,又係咪能夠接受得到?真實嘅生活係瑣碎而平淡,亦係婚姻生活嘅本質。婚前輔導可以協助準新人深入探討雙方對婚姻嘅期望,為日後婚姻生活作心理準備。

2. 原生家庭對雙方嘅影響
原生家庭對價值觀、性格形成、行為思想都有重大影響,若對方父母嘅婚姻關係唔和睦,經常嘈交、甚至慣用暴力嘅方式解決分歧,可能對新人結婚後相處有影響。而童年時經歷,如父母有賭錢習慣、經常被體罰等,都會對結婚後情緒宣洩、甚至生小朋友之後嘅教養方式有影響。另外,拍拖係兩人之間嘅事,結婚係兩個家庭嘅結合,婚後點樣同對方父母親戚相處、分擔照顧嘅責任,都係婚前輔導時深入討論要調解嘅重點。

3. 處理過去拍拖時不快事情嘅後遺
無論拍拖咗幾耐,拍拖時總會有高低起跌、意見不合嘅時候,但事情過後有冇好好理?還是由得時間過去,唔再提起就算數?其實可能已成為心中嘅一條刺,唔知幾時嘈交就會再次提起。婚前輔導可以幫助雙方回顧拍拖時嘅快樂與傷痛,處理感情創傷,以免成為婚後嘅「潛在炸彈」,回憧憶愉快經歷令彼此更認定對方。

4. 家庭開支/財務分配
婚後會雙方財政獨立?每個月撥幾多錢做家庭開支?邊個負責找水、電、煤、電話費?由於雙方價錢觀、金錢觀有差異,呢啲日常鎖碎事,往往就係夫婦間出現矛盾同衝突嘅地方。透過婚前輔導可以幫助準新人作家庭財務預算同分配,協商出適合嘅理財方式。

5. 性與家庭計劃

唔少準新人喺結婚前礙於傳統思想,或宗教影響,唔會觸及「性」呢個話提。但喺婚姻生活中,「性」係不可劃缺嘅存在,性生活協調有助增加夫妻間嘅親密度,維持美滿婚姻。同時,婚後成為老公、老婆,以至爸爸、媽媽,在家庭角色同崗位上嘅轉變,生小朋友的共識,都係婚前輔導中非常重要嘅一環。

由情人變成夫婦,需要面對各方面嘅轉變同挑戰,婚姻輔導幫助準新人喺心理上作好預備,落實婚後各樣計劃。各位準新人不妨將婚前輔導納入籌備結婚事項中,其中一樣啦!

【編按:以上內容為作者之個人意見及立場】

相關文章

男主外,女「煮」內?家庭分工告別角色定型!

新抱奶奶一定激鬥?5大好奶奶特質!你好命遇到嗎?

男人真係可以咁狠心「話變就變」?

【自私精老公】解構嫁咗仲差過做女原因!