2019-11-22

1.3K

3大類另一半常見壞習慣,有冇你份?

所謂「相見好,同住難」,拍拖時同另一半幾sweet幾夾都好,住埋同一間屋總有啲嘢會睇唔順眼,尤其係啲生活小細節、壞習慣,未結婚前冇王管(或者由阿媽管)覺得冇所謂,結婚之後另一半見到就會咦咦哦哦!討論區熱話講緊「你地另一半有咩壞習慣,頂佢唔順?」係咪一見到呢個題目,腦裡面即刻有好多畫面湧出嚟呢?即刻click入討論區齊齊講下啦!

1. 冇手尾
「冇手尾」呢樣真係幾乎人人都中,最多JM講嘅係用完啲物品唔放好,擺到周圍都係,搞到另一半阿四咁要不停執屋。最極級嘅例子係水杯用完唔洗,寧願不停用其他乾淨杯,用到冇就直接倒水入口飲!洗一洗隻杯,真係咁難?另一樣都多JM講嘅係「廁紙用晒唔換卷新嘅落去」,呢樣真係幾大獲,下一手去去下廁所先發覺冇廁紙,咁啱屋企冇人嘅話真係叫天不應,叫地不聞!簡直令人心理壓力爆標啊!仲有買完嘢就咁一袋二袋放喺廳,成個星期都唔放好、廁所地下有水又唔抹,踩到有黑色鞋印、收咗信但唔拆信,硬係要三催四請先肯拆,拆完先發覺有嘢到期(甚至係已經過咗期)要處理。

不過,原來太有手尾,好鍾意執嘢都會畀人投訴:執得太整齊,到另一半要用某啲嘢嘅時候,唔知佢執咗去邊!

2. 衛生問題

好多JM都投訴另一半唔注重衛生,激氣指數最高嘅係「小便唔對準,搞到馬桶邊都有」!講真,又唔係細路哥啱啱學企喺度小便,馬桶又唔係細,對準小便係咪咁難?仲要解決完就拍拍屁股走咗去,難為人哋要抹返乾淨!另一樣極唔衛生嘅習慣就係:「講緊正經嘢時喺度撩鼻屎」!當住屋企人面前展現真我好正常,但撩鼻屎的確好污糟,重要不停撩,撩完又唔知佢有冇即時洗手,同埋總係人哋認認真真同佢講嘢嗰陣先嚟撩,算咩態度先?其他唔衛生嘅習慣仲有出完街入到屋唔洗手、未乾透嘅衫照放入衣櫃,想唔發霉都難、夜晚唔刷牙就瞓,仲話啱啱食完薯片啲味好正,唔想刷走喎!到蛀牙嗰陣時先投訴做乜唔提佢刷牙。啲人咁自相矛盾,真係唔知點服待囉!

3. 相處習慣

同人講嘢,最嘔血莫過於「人講佢就瞓,瞓醒佢又問」,啲嘢講幾十萬次都聽唔到,之後問返你轉頭,仲要怪你做乜發佢脾氣,真係攞命!另一個千古謎團係,睇醫生喺咪仲痛苦過擔泥?啲男人總係唔病到撻低都唔肯去睇醫生食藥,明明不停索鼻涕,畀紙巾佢抹又話冇鼻涕,一個唔該仲傳染成屋人,真係多得佢唔少!仲有其他典嘅壞習慣,例如:另一半放工返到屋企淨係打機唔幫手做家務、瞓覺瞓得極度活躍,一覺醒來所有被同枕頭都跌晒落地、捲走晒啲被,自己包到手捲咁,另一半就凍到震。所以,兩公婆感情再好,同床瞓都要有各自嘅被同枕頭,就算一個怕熱,一個怕凍(或者兩個都怕凍)都唔會影響到對方瞓覺嘛!

其實兩個獨立個體住埋一齊,梗有差異需要磨合同遷就,只要學識接受同包容,呢啲生活碎事,換另一個角睇都幾有趣!

【編按:以上內容為作者之個人意見及立場】

相關文章

【C6選擇性失憶】結婚紀念日都唔記得?就嚟老婆姓咩都唔知道!

「親子」功課,咪即係媽媽做功課~!

小朋友帶給父母6個歡樂的理由

結婚前傾傾先,婚前輔導5要點締結和諧婚姻