2019-04-25

4.6K

奶奶當新抱生仔機器 網民:生咗都唔會好過!

適逢睇到網民喺Form開Post感慨:一日唔生BB,都唔使指意奶奶對自己好。其實長輩恨抱孫都好正常,但人哋新抱都有選擇權架嘛。而家又唔係買個女人返嚟專生仔,香港地,唔計劃好就生個B出嚟簡直係遺禍人間添啦。

有網民一語道破:喺奶奶眼中,你只不過係一個生仔機器。喺呢個前提下,無論生定唔生都一樣冇運行。因為佢根本唔尊重個新抱,自然睇乜都篤眼篤鼻。

其實每段關係都唔應該由討好一方為出發點,道理好簡單:愛你嘅人唔會願意你屈就自己,唔愛你嘅人只會得寸進尺佔盡便宜。會用「你做咗乜我先會開心你先對得我住」去情緒勒索嘅人,根本就自私自利。所以網民講得好啱喎!喺呢個case,唔好以為生咗奶奶態度就會一百八十度轉變。Juicy媽話你聽,到時湊小朋友教小朋友,呀奶奶仲多位入呀。

婆媳關係惡劣,係咪新抱永遠冇好日子過?非也,主要都係睇枕邊人表現如何。有網民就話自己講明唔生仔,喺夫家已榮登「頭號壞女人」寶座。咁又如何?老公唔接受家人非議自己老婆,就識得兵來將擋架啦。有智慧嘅女人會灌輸另一半一個概念:既然夫婦同為一體,人哋唔尊重我,咪即係落你面!

即刻上討論區一齊傾

【編按:以上內容為作者之個人意見及立場】

相關文章

一人一句收過長輩咩禮物 利是、零食仲有OO

老土奶奶:個仔係寶新抱係草,人哋個女嫁嚟為服侍佢?