2018-06-08

11.9K

身在福中不知福?老爺奶奶太「熱心」幫坐月 新抱壓力爆煲

老爺奶奶太「熱心」,原來唔係個個新抱頂得順。有網民分享,有新抱啱啱生完,好想幫手嘅老爺奶奶可能覺得「多個人多雙手好辦事」,成日走上去煮吓飯、執頭執尾咁,想兩公婆可以瞓多啲。咁嘅好意,喺人哋角度竟然可能會覺得係滋擾!

雖然老爺奶奶原意唔係想監視新抱,但搞到新抱覺得唔自在的話,就浪費晒老人家一番好意喇。不過有時做得多唔見得係好事,見到話老爺奶奶咁神心留到凌晨幫手,有網民直頭話:睇見都驚呀!

有網民就講得好到位喇,當BB瞓咗覺、老爺抹緊嘢奶奶又煮緊飯嘅時候,新抱可以好自在咁攤喺度休息咩?就算只係上嚟探吓,都要執整齊個人先見得人架嘛。坐月嘅時候又忙亂,身體又未復原,有邊個會想費呢個心思去應酬嘅啫。湊BB嘅嘢,一陣奶奶覺得唔應該咁咁咁,無意一句都可能令新抱唔開心。你知喇,啱啱生完受荷爾蒙影響嘛。仲要老爺一個男人存在,都會令新抱處理傷口或餵奶時冇咁方便。

就算老爺奶奶講明唔想阻住新抱,有新抱朋友到訪時會迴避,或者切吓生果招呼吓。但如果新抱吓吓都要同老爺奶奶報備幾時有人嚟,或者聽住親朋好友講:「你就好喇,老爺奶奶咁樣服侍你」,都唔會覺得好受啦。

有啲網民就話,咁咪仲好,老人家唔使再去做阿四,你估照顧生完嘅女人同BB好輕鬆呀?新抱有人可以幫到手就應該知足,唔好身在福中不知福先得架。

Juicy媽就咁睇,喺呢件事當中,唔可以怪老爺奶奶做得太多,亦唔可以話新抱唔識感恩。只係大家都要企喺對方嘅角度諗吓,就好多嘢自然就會明白。

入去討論區一齊傾

【編按:以上內容為作者之個人意見及立場】

相關文章

緊貼新冠肺炎最新相關資訊