2018-09-07

7.9K

「我以後唔煮飯啦!」煮到身水身汗小朋友唔肯食點算?

媽媽最大任務,就當然係養到小朋友肥肥白白~之不過煮到身水身汗,主子們唔一定領情架喎,一陣寧願食公仔面午餐肉真係激到你反艇。喺forum見到有媽媽開post話自己咁畀心機煮,但小朋友好似食緊屎咁,一係食食吓呆喺度,一係含住啖飯唔肯食。網友嬲到倒咗碗飯,怒吼一聲:「我以後唔煮啦!豉油撈飯算喇!」

其實唔少媽媽都受呢個問題困擾,由做女時十指不沾陽春水,都而家煎炒煮炸,你以為咁容易咩?網民都叫樓主relax~因為呢個情況正常到不得之了呀!總結咗以下小tips,希望幫到同樣氣餒嘅媽媽們!

轉吓花樣 保持驚喜
小朋友眼中嘅「轉花樣」同大人唔係好一樣,大人覺得花盡心思,每日三餸一湯唔重複已經好足夠。但小朋友會覺得日日食米飯悶,有媽媽就提議有時可以食吓通粉、pizza同壽司等等。有新鮮感,小朋友食得都快啲啊~

減少零食 留好胃口
有時小朋友食得多零食,正餐食唔落都好正常架。所以唔畀小朋友食咁多立雜嘢可能有用,如果其他時間嗌餓就請佢咃期待食飯啦。日頭帶小朋友去公園放吓電,跑吓跳吓消耗能量,胃口都會好啲架~

訂立規矩 唔食罷就
有網民話唔食就算,磨爛蓆都冇用。如果真係唔肯食,夠鐘就收枱啦。小朋友餓吓,下次就唔敢食得太慢。不過呢招講就口響,好難真正實行。試問邊有媽媽見到小朋友餓唔心軟架~

其實小朋友唔明媽媽煮飯辛苦都好正常,幾歲人仔邊識得咁多吖。媽媽們都可以教佢哋珍惜自己心意,話佢哋知呢樣嘢唔係必然架~個人覺得咪偶爾畀小朋友食吓冇咁有營養嘅食物囉,佢哋有得過吓口癮,自己又回吓氣。逼到自己咁辛苦,但原來個個都唔開心就冇意思啦。

入嚟討論區一齊傾

【編按:以上內容為作者之個人意見及立場】