2019-11-21

1K

【對仔歡喜背後愁】唔想為子女升學煩惱,唔通要由揀另一半開始? 

面對啱啱公佈嘅「自行分配學位」結果,Juicy媽覺得事實真係好殘酷,有人歡喜,自然有人愁,香港嘅學位競爭激烈,做人父母想「望子成龍」都係好正常,但又有幾多人真正可以順順利利咁如願入到心儀學府呢?為咗可以多個機會,家長們搞盡腦汁,有人為咗同心儀學校有相同宗教背景而返教會,又有人為咗「統一派位」搬去心儀校網,但結果都有可能中空寶,咁樣搞法,喺小朋友要面對學習壓力爆煲之前,家長就先要過咗呢關壓力測試!

其實每年都有JM們討論小一入學統籌辦法(即「自行分配學位」及「統一派位」)機制是否公平嘅問題,有JM仲提出應該請求教育局取消「父/母/兄/姊為該小學的畢業生」嗰 10分,以增加其他學童入讀機會!Juicy媽消極啲咁諗,制度嘅嘢真係好難話改就改,喺改變唔到自己讀咩母校嘅情況下,莫非要由揀另一半開始?

討論區熱話:請教育局取消「父/母/兄/姊為該小學的畢業生」嗰 10分

討論區熱話:請教育局取消「父/母/兄/姊為該小學的畢業生」嗰 10分

講到底,取消嗰 10分對大家有無好處,Juicy媽真係唔識下定論,之不過如果要教育局貿貿然改制,始乎係天方夜談嘅故事,而且學位就係得咁多,無論點改都總有人落空、總有人唔開心,有唔少JM都覺得要滿足每個人確係唔容易:「世界上是沒有公平的,好難滿足每個人。」、「雖然我不是此制度的受益人,但也不反對,好明白兄弟妹當然想同一間讀書,父母想子女讀自己母校也是理想當然」、「每人都有自己嘅路要行, 你理唔到嘅事理來做咩,教小朋友行好自己條路就好了。」

雖然呢個制度或者真係略帶唔公平,但有時候玩遊戲,就只有遵守規則,如果講到要取消,其實香港仲有唔少令學童覺得抖唔到氣嘅考試安排,佢哋比世襲制更折磨學生,咁唔通又話取消就取消咩?

最後Juicy媽祝願大家嘅小朋友都入到適合自己嘅學校,享受無憂無慮嘅校園生活,父母們都唔好因為結果令自己太過情緒繃緊,影響家庭關係;無論點都好,有咩好得過家人和諧、仔仔女女開開心心呢?

【編按:以上內容為作者之個人意見及立場】