2019-03-18

2K

【慳錢媽媽高招】同工人分開買材料同煮食又WORK唔WORK?

生活每一秒都係錢,就算瞓緊覺開住冷氣都係用緊錢,水、電、媒、交通,呢啲慳極有個譜。而唔少家庭都由媽媽掌管金錢,正所謂「小數怕長計」,有時真係不得不諗諗計慳錢……最近有媽媽就喺討論區想集思廣益,睇吓點樣可以從工人姐姐方面慳錢。

樓主講明家中兩位姐姐偏大食,由原先跟樓主一家齊齊食有機食物,到後期分開買餸、調味料、白米等,目的都係想控制成本,同時令姐姐食得飽。不過呢個做法,就吸引咗唔少姐妹話樓主做法「有缺憾」。

難免姐姐偷龍轉鳳

其實樓主已經做得好明顯,雞蛋、雞翼、豉油、米等食材分開買唔同種類:樓主一家偏向有機貨,姐姐就食普通貨;無可否認,減少購買有機食物嘅量,的確可以慳到成本。但平日大部份時間樓主都要返工,得工人姐姐同小朋友喺屋企,有如「冇王管」一樣,假若姐姐「黑心」啲,調轉兩款食材嚟煮都仲得!

更何況,食物拆去包裝之後,原材料都一樣樣,點樣分別邊款係貴嘅有機貨?邊款係平價嘅普通貨呢?真係食咗落肚都唔知!

分開煮食水費、爐火更貴

由於食材唔同,煮食方法亦可能有所唔同;樓主一家嘅食材先煮一輪,而姐姐嘅食材就可以跟據自己喜好同口味另外再烹調,變相煮一餐飯要開兩次火,爐火費當然加倍。若然推前到清洗食材,為免混淆兩款食材,清洗亦要分開兩次洗,水費可想而知亦要加倍……

唔少姐妹留言話「索性唔好請工人」,不過一家唔知一家事,實情真係得樓主自己先知。有姐妹就提醒「針冇兩頭利」,請得工人姐姐,多咗人住喺同一屋簷下,日常洗費一定會增加。如果真係要由食材成本到著手,或者可以用小朋友身體健康為前提:「小朋友食有機野,大人就跟姐姐食一樣」,好好同姐姐溝通下,多數姐姐都體諒嘅。

另有姐妹提供自己屋企現行方案:每個月提供一筆伙食錢畀姐姐自己食,任得佢點用筆錢,有剩錢的話就由佢袋。姐姐有錢落袋,相信佢哋都會慳住洗。你又有冇方法建議吓呢?

即上討論區一齊傾

【編按:以上內容為作者之個人意見及立場】

相關文章

緊貼新冠肺炎最新相關資訊