【父母好肉赤系列】返學大喊包!去仔返學都要「斷捨離」

作者:茄莉姨姨

2019-09-12 556


數數手指,原來都開咗學差不多10日,面對返學,對於第一年入學嘅幼稚園學生同家長都係一項大挑戰,要睇小朋友適唔適應群體生活之餘,又要習慣一個全新嘅生活模式,仲要應付其他突如奇來發生嘅狀況,確係令人心很累,而以上嘅所有事,應該就由送佢入學校/課室門口開始。

唔知到咗今日,大家嘅小朋友返學果陣仲有冇喊呢?講到呢個話題,可以話勾起咗唔少JM嘅「美好回憶」,你以為喊足10日已經好誇張?原來個世界真係天外有天,唔信嘅話,就真係要睇睇JM們嘅討論:「濕碎啦,最勁係喊半年」 、「我仔大叫唔返學,仲喊到嘔 」、 「我女喊咗兩年」!

睇到呢度,確實相當嚇人,要見到自己小朋友喊到嘔,仲喊足兩年,真係點會唔心痛,唔想呢件事發生喺自己身上,就要學識「斷捨離大法」,總結大家嘅「返學攻略」,結論只有一個,就係要「快、狠、準」,家長同小朋友道別後,就要極速逃離現場,唔好比小朋友有半秒思考空間,因為大多數小朋友嘅「喊點」就係唔捨得父母離開,將「準備分開」嘅時間拖長,會令佢哋覺得繼續喊,父母就唔會走,所以唔想佢喊,離開先係最好嘅辦法!

有大部份小朋友喺父母離開之後,就會極速收聲,明白喊都無謂,如果想小朋友可以喊少兩秒,做父母就要學習「斷捨離大法」,雖然係唔捨得又肉痛,好似要賣咗個仔咁,但係眼淚都係留返比自己心裡流啦!

除咗肉赤之外,作為家長更加擔心佢嘅表現會影響到佢嘅人際關係,搞到同學、老師都唔太鍾意佢,講真人心肉做,老師都係人,點會唔偏心!而且仲要照顧咁多學生,個個都會有連鎖反應,你一個喊,就個個喊,調返轉你都唔會特別鍾意呢個學生啦!又至於有人話,小朋友喊可能係反映佢唔適合又或者唔鍾意果間學校,如果家長有咁嘅憂慮,就要多啲同小朋友傾偈,了解下佢返學情況喇!

即上討論區一齊傾

【編按:以上內容為作者之個人意見及立場】